Bualte daia leiminin NH-54 a tiping leh; Bualte-Ṭhualṭhu kawngah kal lo turin ngen

Bualte leh Ṭhualṭhu inkara nasa taka leiminin NH-54 kawngpui a hnawh pin chu nimin khan lirthei kal theiha tihtlang a ni a, lirtheite kal tlangtir a ni. Lirthei kal laiin lei min lehin, lirthei pathum a delh a, thi leh hliam an awm lo. He kawngah hian kal rih lo turin Lunglei Bawrhsap chuan mipui a chah.

Thu dawn danin, Bualte daia nasa taka leimin hi nimin chhun dar 12 vel khan lirthei kal theiha nawr tlang a ni a, lirthei tangkhangte kaltir nghal a ni. Lawngtlai lam aṭanga Lunglei lam pan lirthei (LMV)-te kaltir hmasak a ni a, lirthei 10 velin an paltlang laiin, chawhnu dar 1 pelhah lei a tawlh leh a, lirthei pahnih a delh a ni.

Bualte daiah hian August 2, 2025 zing khan nasa takin kawng chhak lam a min a, August 4 tlai lamah lirthei tê kal theih tura nawr tlang a ni. August 5 chawhma lamah nasa takin a min belh leh a, nimin chhun dar 12 vel khan nawr tlang leh a ni. Nimin chawhnu dar 1 pelh hretah lei a min leh avangin kawng a ping leh a, nimin tlai thleng khan tihtlang a la ni lo.

Lunglei District Disaster Management Authority (DDMA) chairman Navneet Mann, district bawrhsap chuan NH-54 Bualte leh Ṭhualṭhu inkar-a leimin vanga kawng ping chu ngawrh taka then fai zel ni mah se, ruah a tlak chhunzawm reng avangin kawng tihtlang theih a la nih loh thu a tarlang a; he kawng hi zawh rih lo turin khualzinte a chah.

Lunglei Bawrhsap chuan nimin khan hriattirna tichhuakin, "Bualte leh Ṭhualṭhu inkar kawngpui dinhmun avang hian he kawng hi khualzinte tan zawh a him rih lo tih kan inhriattir a, Lunglei piah lam Lawngtlai/Siaha district mite leh district dang aṭanga Lunglei piah lam kal tumte chu Sangau kawng lama kal rih turin kan inngen a ni," a ti.

Leimin vanga khualzin tam tak an táng leh mi tam takin harsatna an tâwk chu pawi an tih thu tarlangin Navneet Mann chuan, "Kawng tlang tur hian theihtawpa hna thawh chhunzawm zel a ni dawn a, lei minna hmun hi laih tlang a nih hunah pawh leimin belh theihna lai a la tam hle avangin thenfai hna a chak thei lo," a ti a; thenfai hna thawktute himna tur leh chhiatna dang thleng thei laka inven tel a ngaih avangin fimkhur taka hmalak a ṭul thu a tarlang.