AR-in Anti Drug Campaign an ṭan

Assam Rifles 23 Sector chuan nimin khan Mizoram puma an kalpui tur ruihhlo dona thawh khatna, 'Anti Drug Campaign' chu an ṭan a; AR 23 Sector DIG Brig. Digvijay Singh-a'n hawngin, a kaihhruaiin thutiam chham a ni.

Assam Rifles Anti Drug Campaign bul ṭanna inkhawm, Aizawla neihah hian tlawmngai pawl hruaitute an tel a; Mizorama ruihhlo dinhmun tarlanna drug awareness video an chhuah bakah, sawihona hun an hmang.

Lungleiah pawh Assam Rifles chuan Lungleia Bullet bike neite pawl Royal Knights nen ṭang dunin nimin khan 'Say No to Drugs Drive' an buatsaih a, MLA Dr K Pachhunga'n a hmanpui.

Royal Knights member mi eng emaw zat chu nimin chawhma khan Lunglei Venglai aṭanga tlân chhuakin Serkawn thleng an tlân a, an lêt leh lamah WADA Integrated Rehab Centre for Addict, Chanmari-ah ei tur chi hrang hrang an pe. Chumi hnuah 3 (Naga Hills) Bn Assam Rifles hmun, Sethlun helipad-ah lutin, inkhawm neih a ni.

Dr K Pachhunga chuan, ruihhlo laka fihlim tura inzirtirna leh ruihhlo do tura hmalakna chu ṭha a tih thu sawiin, rally satliah leh nawmchenna mai mai ni lo, ruihhlo dona rally buatsaih a ni hi a ropui a tih thu a sawi a, "Kan ramah drugs a hluar em em a, kan nula leh tlangval tam takin drugs avangin an nunna an chán a,chhungkaw tam tak lungngaiin an rûm a ni," a ti.

AR hian Anti Drug Campaign hi Mizoram pumah an kalpui dawn a, thawh liin kalpui an tum. Campaign-in a tumte zingah - ruihhlo kaihhnawih sualna leh tharum thawhna tihtlem te, ruihhlo kaihhnawih vanga hriselna leh mipui vantlanga sum kal nasa lutuk tihtlem te, Mizo ṭhalaite zingah ruihhlo ṭhat lohzia zirtirte a tel tih an tarlang.

Assam Rifles tarlan danin, kum 1984 aṭanga kum 2020 thleng khan Mizoramah ruihhlo vangin mi 1,639 an thi a, chu'ng zingah chuan hmeichhia 131 an tel. Kum 2020 chhung bik khan rehabilitation-a awmte chhiar tel loin ruihhlo vanga thi mi 50 an awm bawk.

India ram pumah mihring awm zat aṭanga 0.7% vel chu ruihhlo ti ṭhin an ni a; mihring zat aṭanga chhûtin Mizoram hi ruihhlo ti tamna ber state a ni. Tun hnaia Social Welfare department-in a zir chian dan chuan, Mizorama ruihhlo ti ṭhin zinga 27.8% chu Aizawl district-a mi an ni.