MC kawtah Pineaple Bonanza ṭan

Mission Organic Value Chain Development for North Eastern Region (MOVCD-NER) chuan nimin zing khan Millennium Centre kawtah Pineaple Bonanza tum vawi lina an buatsaih ṭan a, Agriculture & Farmers Welfare minister PC Vanlalruata'n a hawng.

Pineapple Bonanza hi August 9, 2025 thleng buatsaih a ni dawn a; Khawzawl leh Serchhip district-a Organic FPC ni tura hma la mek - Raifan Organic FPC leh Tuikum Organic FPC te thar lakuihthei pho chhuaha zawrh a ni.

Lakhuihthei chingtute chu MOVCD-NER scheme Phase IV hnuaia loneitu inziak lutte an ni a, Khawzawl leh Serchhip district-a Raifan leh Tuikum Organic FPC hnuaia intel khawm niin, Mission Organic Mizoram (MOM) - State Leading Agency leh Clover Organic ten an enkawl mek an ni.

Minister PC Valalruata chuan, organic thlai a hrisel bik thu sawiin, Mizoram chhungah organic hmanga lakhuihthei thar chhuah tlâwm zawka mipuiin an lei theih nan organic hlutna nasa taka inzirtir a la ṭul thu a sawi a; hlo túr chi reng reng hmang tlem tial tial turin kut hnathawktute a chah bawk.