Centre for Specially-Abled Persons hnenah HFW Minister-in thilpek a hlan

Social Welfare minister Lalrinpuii chuan nimin khan pianphunga rualbanlote tana buatsaih, Training Centre for Specially-Abled Persons, Tanhril leh he Centre hnuaia State Braille Press a tlawh a; Centre hnenah Aquaguard water filter leh steel almirah a pe.

Minister hi Social Welfare secretary Lalzarmawii, director Dr Lalhriatzuali Ralte leh hotu dangte'n an ṭawiawm a, hmasawnna hnathawh kal mekte thlirho a ni. Lalrinpuii chuan, rualbanlo zirlaite chu fuihin, rinawmna leh dikna nena nung tur leh Pathian hre reng turin a chah.

Specially-Abled Persons Training Centre-ah hian mitdel hawrawp print theihna khawl, State Braille Press bun a ni a, mitdelte hman tur zirlaibu, ballot paper leh thil dangte print ṭhin a ni. Pawl 9-12 zirlaibute an print mek a; mimal leh sorkar tan dawr theih reng a ni.

Training Centre hi kum 1981 khan ‘Handicapped Training Centre’ tiin Laipuitlangah din a ni a, kum 2017 khan Training Centre for Specially-Abled Persons tia hming thlak niin, April 2025 khan Tanhrilah sawn a ni. Puanṭhui zirna seat 30 awmin, thla 8 chhung zirtir ṭhin a ni a; riahchilh loa lehlanga kalte chu thla tin stipend Rs 700 pek an ni ṭhin a, training an zawhah puanṭhui khawl leh khawl dangte pek ṭhin an ni bawk.

Mizoramah rualbanlote tan training centre pali - Tanhril, Dam Veng, Chaltlang leh Lungleiah a awm a; thil chi hrang hrang zir theih niin, mi 1,990 vel an inzir chhuak tawh a ni.