Sawhthing hralh turah sorkarin a lei loh a tam loin kan hria - MAMB Co-chairman

Mizoram Agriculture Marketing Board (MAMB) co-chairman Dr KC Lalmalsawmzauva, adviser to CM (Handholding) chuan, kut hnathawktute sawhthing thar hralh tura tih zingah sorkarin a lei loh a tam loa an hriat thu a sawi.

Mizoram sorkarin a chhinchhiah chinah, kuminah sorkarin Mizorama sawhthing thar quintal 3,47,387.40 a lei. Sawhthing hralh tur zingah sorkarin a lei tâk loh a tam leh tam loh zawhna chhangin KC Lalmalsawmzauva chuan, "A tam loin kan hria. Sawhthing thar beisei zatte kan sawi a, beisei zat a ni a, khaw tam takah chuan kan beisei dan lutuk avanga lo sawi tam deuhte pawh awm theih a ni. Sawhthing thar zinga tam tak chu a chi atan an dah a, kuminah pawh an ching leh nasa viauin kan hria," a ti.

Dr KC Lalmal-sawmzauva chuan, sawhthing lei zat chiah hi a la kim lo thei tih sawiin, "Portal-ah rawn luh a la awm zauh zauh," a ti. August 2025 chhungin sawhthing leina man sorkarin pek vek a tum thu a sawi rualin, society ṭhenkhatte'n sorkar ruahmanna mil loa sawhthing lei kalpui an awm avangin hmun ṭhenkhatah khawtlai hret theih a nih thu a sawi bawk.