Mizo puantah hmasawn dan tur sawi dun

Chief minister Lalduhoma leh National Handloom Development Corporation Limited managing director Commodore Rajiv Ashok te chu nimin khan Delhi Mizoram House-ah an inkâwm a; Mizo puantah tihhmasawn dan tur an sawi dun.

Inkawmnaah hian Mizorama yarn (lâ) dâwr (warehouse) siam dan tur te, Mizorama pisa hrang hrang leh sorkar hmun pawimawha tualchhung siam chhuah hman tam dan tur te, siam chhuah ṭha leh tlo zawk a awm theih nana Jacquard handloom uar ve dan turte sawi a ni.

Puantahtute thiamna tihsan zel dan tur leh state pawna an intihlar theih dan tur te, puantah leh a kaihhnawih thilah Mizoramin nasa zawka hma a sawn lehzual theih dan tur National Handloom Development Corporation-a mithiam­te'n an ruahmanpui dan tur te, Mizoramah mulberry pangang aṭanga lâ siam chhuah tam lehzual theih dan turte sawi a ni bawk.

CM Lalduhoma hi officer on special duty to CM R Lalrodingi leh CM private secretary Lalrinawma Khiangte ten an ṭawiawm a ni.