KHAWTHLIR

Combined exam

Mizoram Public Service Commission chuan Mizoram Civil Services (Combined Competitive) Preliminary Examinations 2025 chu naktuk Zirtawpni hian a buatsaih dawn a, exam tuma inziak lut mi 4,740 an awm. Exam hi district khawpui tinah buatsaih a ni dawn a, Aizawlah chuan hmun parukah buatsaih a ni ang. Combined competitive exam-ah hian sorkarin dan a tidanglam a, main exam-ah optional paper/subject a awm tawh dawn lo a ni.

MSHCS CEO

Dr Lalhriatzuali Ralte, Social Welfare director leh LESDE special secretary chu a hna pangngai bakah Mizoram State health Care Society chief executive officer hna chelh tura tih a ni. Hemi chungchangah hian nimin khan DPAR Secretary-in order a chhuah. MSHCS CEO ni lai Dr Biakthansangi chu hmun dangah sawn a ni.

Lui humhalh zirtir

Hnahthial District Fisheries Development Office chuan nimin khan Lungleng BCM Kohhran Sunday School Hall-ah Baptist English School zirlaite pualin lui dung humhalh pawimawh zia inhrilhfiahna an buatsaih. DFDO George Lalnuntluanga'n a hmanpui a, district programme manager F Lalhmangaihzuali'n zirlaite chu lui dung humhalh pawimawhnate a lem nen a zirtir a ni.

Har Ghar Tiranga

Sorkar laipuia Ministry of Culture-in India ram state/district tinte Independence Day puala Har Ghar Tiranga hmang tura a hriattir angin Champhai leh Serchhip district-ah chuan August 11, 2025 khian India hnam puanzar kenga kawng zawh (Tiranga Yatra) huaihawt a ni dawn a; sorkar pisa leh mimal inahte Indian hnam puanzar târ rûnpui neih a ni bawk ang.

Rulhut hlo pek tur mi 31,700 awm

Kolasib district-ah August 11, 2025 khian damdawi-in, zirna-in leh anganwadi centre-ahte rûlhût hlo pek ni, National Deworming Day (NDD) an hmang dawn a; rûlhût hlo pek tur naupang leh tleirawl kum 1-19 inkar mi 31,700 an awm. Zirna-ina dawng lote chu accredited social health activist-te'n an inah kal chilhin an pe dawn a ni.