COVID-19 Vaccination Dry Run buatsaih

Nimin khan Health department-in district a ṭhen dana Aizawl East district hnuaia ITI Veng Urban PHC-ah leh Aizawl West district hnuaia Chawlhhmun PHC-ahte 'Covid 19 Vaccination Dry Run' neih a ni a; Covid-19 laka invenna damdawi (vaccine) a awm huna a dawngtu turte hnena pek dan tur enchhin a ni.

Covid-19 vaccine pek chhuah theih a nih huna pek dan tur enchhin vek turin sorkar laipuiin a tih angin nimina enchhina hi buatsaih a ni a; vaccine dawngtu tur mi 25 koin, a nih dan tur ang taka a pekna hmun tura ruata pek dan tur enchhin a ni. Vaccine a la thlen loh avangin vaccine tak tak erawh pek a ni lo.

Sorkar thuchhuah tarlan danin, Covid-19 laka invenna damdawi chu pe chhuak mai thei turin sorkar laipui a inbuatsaih a; damdawi a la tam tâwk loh avangin National Expert Group on Vaccination of Covid-19 (NEGVAC) chuan damlo enkawltu (healthcare worker)-te pek hmasak turin state tin a inbuatsaihtir mek.

Covid-19 hri danna dawng hmasa turte chu chhinchhiah vek tawh a ni a, damdawi pek theih a nih hunah pek turte chu SMS hmangin hri danna an lâk hun tur leh a hmun tur hriattir an ni ang a, a dawngtu turte'n lakna tur hmun an pan ang. List-a chuangte chauh pek tur a ni a, vaccine lâk dawnah photo identity card ken a ngai. Hri danna pek chungchangah hian sorkar laipui chuan UNDP hmalaknain software hranpa CoWIN a siam a ni.