Politics bawlhhlawh leh thianghlim lo kan siamṭha zel ang - ZPM Ṭhalai President

ZPM Ṭhalai president Malsawmzuala chuan, "Politics bawlhhlawh leh thianghlim lo hi kan siamṭha chho zel ang a, danglamna thlentu kan ni zel ang," a ti.

Nimina ZPM pisaa ZPM Ṭhalai hruaitute ṭhutkhawmnaah thu sawiin Malsawmzuala chuan, ZPM chuan Mizorama politics bawlhhlawh leh thianghlim lote siamṭhat zel a, a ṭha zawnga danglamna thlentu nih an tum thu a sawi a; ZPM Ṭhalai hruaitute chu, ''Kei atan erawh zawng Pathian hnaih hi a ṭha a ni,' tih vawng tlat tur leh, Pathian ringtu nun lan chhuahtir turin a fuih.

ZPM Ṭhalai President chuan, kum 2021 chhunga hma an lâkna turah Pathian hriatpui tlaka ke an pên a ṭul thu sawiin, "Politics bawlhhlawh leh thianghlim lo hi kan siamṭha chho zel ang a, danglamna thlentu  ni zelin, a chhe lai siamṭhatu i ni zel ang u," a ti.

Malsawmzuala chuan, mihring nun chu chhûm rei lo tê langa ral leh ang mai chauh a ni tih sawiin, "Khawvela kan nun hi hmun ṭha zawk atana inbuatsaihna a ni. Nawmsakna, hausakna leh khawvel chenna lam hian kan rilru luah suh se. Kan thâwk a tàwp rualin saruak bawkin kan kal dawn, engmah kan chhuahpui dawn lo," a ti a; mihring mamawh ber chu Lal Isua a nih thu hre reng turin kal khawmte a chah a ni.