SRH-ah Covid-19 vei enkawl Oxygen pek mek mi 10 an awm

State Referral Hospital-ah nimin khan Covid-19 vei mi pathum dah luh belh an ni a, hripui vei rinhlelh thilah mi pali dah luh an ni bawk. Hripui vei vangin SRH-ah mi 24 enkawl mek an ni a, chu'ng zinga mi 10 chu oxygen pek mek an ni.

SRH-ZMC Bulletin tarlan danin, nimin tlai dar 5-a dinhmun angin, SRH-ah hian Covid-19 vei mi 24 enkawl mek an ni a, ICU-ah mi pali awmin, an zinga pakhat chu nimina dah luh a ni. ICU-a enkawl mek zinga pakhat chu ventilator hmantir a ni a, mi dang pathum pawh oxygen pek an ni. Isolation ward-ah mi 20 an awm a, chu'ng zinga pasarih chu oxygen pek mek an ni bawk.

Hripui vei vanga SRH-a enkawl mek mi 24 zingah kum 60 chung lam panga an awm a, naupang kum 14 hnuai lam pali an awm bawk. SRH aṭang hian niminah chhuahtir an awm lo.

ZMC Covid-19 Laboratory chu nimin khan khâr a ni a, swab sample endik a ni lo. January 1, kum thar ni khan sample test an nei lo bawk.