COVID-19: Mizoram dinhmun Hri kái hmuhte symptom nei vek

January 1, Zirtawpni khan Mizoramah Covid-19 hripui vei mi pathum hmuh chhuah a ni a, Mizoram chhunga kái leh natna (symptom,) lang chhuak vek an ni. Nimin khan hripui laka fihlim tawh mi 11 chhuahtir an ni thung.

Covid-19 vei mi pathum hmuh tharte chu Rapid Antigen Test (RAT) hmanga Aizawl district-a swab sample 30 endik aṭangin a ni a; Kolasib district-ah swab sample 71 endik ni mah se, hripui vei hmuh an awm lo.

Kum thar ni khan ZMC laboratory-ah leh TrueNAT-PCR hmangin swab sample endik a ni lo a; sample endik zawng zawng chu 101 niin, chuta ṭanga Covid-19 positive hmuh pathum chu 2.80% a tling.

Hripui vei hmuh thar zinga pahnih chu Bawngkawna mipa kum 68 leh hmeichhia kum 39 mi an ni a, tualchhunga kái ve ve an ni. Covid-19 positive hnimhnaih an neih avangin an sample ZMC-ah endik ani tawh a, negative result an nei a; a hnuah symptom an neih avangin Aizawla private hospital pakhata swab test an tih lehnaah an positive tih hmuh a ni.

Covid-19 vei hmuh thar pakhat dang chu Nisapui khuaa hmeichhia kum 19 mi a ni a; Aizawla private hospital pakhata inentira a kalnaah a sample endik niin, hripui a vei tih hmuh a ni. Covid-19 symptom a nei a, hri a kàina hriat a ni lo.

Nimin khan Covid-19 laka fihlîm tawh mi 11 chhuahtir an ni a; Durtlang BSUP CCC aṭangin mi paruk, Lunglei Sazaikawn CCC, Lunglei Pûkpui CCC leh Lawngtlai CCC aṭangin mi pakhat ṭheuh leh home isolation-a awm mi pahnih an chhuak.

Mizorama Covid-19 vei mi 4,219 hmuh chhuah tawhte chu mipa 3,101 leh hmeichhia 1,118 an ni a; nimin tlai dar 5 thleng khan damin mi 4,111 (97.44%) chhuahtir an ni tawh a, mi pariat (0.19%) thi tawhin, enkawl mek mi 100 (2.37%) an awm.

January 1, 2020 thlengin Mizoramah swab sample 1,80,621 endik a ni tawh a, chu'ng aṭanga Covid-19 positive hmuh chhuah tawh 4,219 chu 2.33% a ni.

Mizorama Covid-19 positive hmuh chhuah tawh mi 4,219 zinga mi 1,999 chu Mizoram chhunga kái an ni a, mi 2,220 chu state páwn aṭanga rawn lût an ni thung.