ZMCH-ah PG zirna hawn tum a ni

Zoram Medical College & Hospital (ZMCH) chuan nimin khan an Lecture Hall-ah an din champha vawi 7-na an lawm a, Health minister Lalrinpuii'n hmanpuiin, ZMCH intern hostel sak thar a hawng. ZMCH-ah hian specialist doctor zirna hawn tum a ni a, NMC thu ngaihchân mek a ni.

Health Minister chuan, ZMCH-a thawktu indaih lohna sukiang turin sorkarin hma a la mek tih a sawi rualin, sorkar department hrang hrangah indaih lohna a nasat avangin hmalak chak a har thu a sawi a, "ZMCH tihchangtlun kawngah sorkarin hma a la mek a, heta aṭanga zir chhuak doctor-te pawh a theih ang angin sorkarin a chhawr zui mek," a ti. Thawktute chu ram tan ṭan la zel tur leh MBBS zirlaite chu theihtawp chhuaha zir turin a chah.

ZMCH director Dr John Zohmingthanga chuan, ZMCH-ah specialist (MD/MS) zirna seat 10 hawn tuma hmalak a nih thu a sawi a, "Keini lam chu kan inpeih tawh a, National Medical Commission (NMC)-a dilna lehkha kan thawn chu an la rawn chhang lo a, kan ngaichâng mek," a ti. Sorkar laipuiin India rama Virus Research and Diagnostic Laboratory (VRDL)-te Infectious Disease Research and Diagnostic Laboratories-a tihchangtlun tur 10 a thlan zingah ZMCH a tel thu a sawi bawk.

ZMCH Founding Day lawmna inkhawm hi Health principal director Dr Lalthlengliani'n a kaihruai a, MBBS zirlai ti ṭha zualte hnenah lawmpuina hlan a ni. Minister-in a hawn tâk, khum 60 awmna intern hostel hi North Eastern Council aṭanga hmuh cheng nuai 690 hmanga sak niin, September 1, 2022 - March 21, 2025 chhunga sak a ni a, contractor chu C Thanseia, Lunglei Chanmari a ni.

Inkhawma tarlan danin, ZMCH-ah hian Mizorama a hmasa ber atan Mizoram Health Systems Strengthening Project (MHSSP) hnuaiah Biopsy Compatible CT Scan bun tum a ni a, PM Abhim Scheme hnuaiah cheng vbc 25 sengin Critical Care Block sak mek a nih bakah, lung zaina unit (CTVS) te, neuro surgery unit leh cardiology ward din tum a ni bawk.

ZORAM MEDICAL COLLEGE & HOSPITAL

- Kum 2018-ah hawn a ni a; a din tirh hian khum 150 a awm a, tunah khum 505 a awm tawh.

- ICU paruk luah mek a ni a, kar hnih hnu vela hawn belh tur a awm a, hawn a nih chuan 13 a ni ang.

- Zirlai mipa hostel pahnih, hmeichhe hostel pathum leh intern hostel pakhat a awm a, zirlai 600 lenna a ni.

- Staff quarters 225 a awm a, mi 120 lenna tur staff hmeichhe hostel sak mek a ni.

- ZMCH tan central leh state sorkarin cheng vbc 300 vel an sên tawh.

- Zirtirtu (faculty) 122 leh junior resident 25 an awm.

- Doctor 80 vel chu ZMCH-a zirtirtu leh damdawi-in lamah an awm kawp a; doctor 60 chu academic lamah an awm.

- Nursing, paramedical leh a kaihhnawih thawktu 450 an awm.

- Non-clinical/support/engineering staff 120 an awm.

- Project/research ti mek 60 an awm.

- Doctor zirlai 394 (2021-24 batch) an awm mek a, kar leh aṭangin zirlai thar 100 an luh belh ang.

- Intern ti mek mi 98 an awm.

- MBBS zo tawh mi 189 an awm a, 2018 batch mi 97 leh 2019 batch mi 92 an ni.