Bána Kaih turin mi 2,903 thlang tawh

Mizoram sorkar flagship programme Bána Kaih (Handholding) scheme hnuaia loan hmu turin mi 646 thlan leh Chief Minister's Special Package dawng turin mi 2,257 thlan an ni a; August 2025 chhungin Bána Kaih Phase-II kalpui hman tum a ni.

Mizoram State Policy Coordination Committee (MSPCC) chu nimin khan Planning department committee room-ah an ṭhu a, Bána Kaih (Handholding) Phase-II kalpui dan tur an rêl. MSPCC vice chairman Dr KC Lalmalsawmzauva, adviser to CM (Handholding)-in a kaihruai a, Planning secretary Lalmalsawma Pachuau-in sawiho turte a sawifiah.

KC Lalmalsawmzauva chuan, Bána Kaih hnuaia thawhpui ni duha theihna leh thiamna nei, eizawnna bul ṭan tum, tih tak zeta hmalak tum mi 11,456-in Mizoram sorkara department 16 kaltlangin dilna an thehlut a, department, Apex Body leh bank lamin an zir chian hnuah Bána Kaih hnuaia loan hmu turin mi 646 thlan an nih thu a sawi.

Chief Minister's Special Package hnuaia ṭanpuina dawng turin mi 2,257 thlan an nih tawh thu sawiin KC Lalmalsawmzauva chuan, "Progress partner thlante tan hian orientation training-te buatsaih a ni a, an bank account-ah an hmalakna tur sum thun mek zel a ni," a ti.

Ṭhutkhawmah hian CM Special Package dilna form ennawn a ni a, online-a dil theih dan tur sawiho a ni. Progress partner tur chu kum 18-60 inkar ni se an ti a; dilna lut tawh eng emaw zat ennawn niin, Commerce & Industries hnuaia dilna 18 ennawnte chu pawm a ni. Mizoram Khadi & Village Industries Board chu implementing agency-ah telh thar a ni bawk.

MSPCC Vice Chairman chuan, Bána Kaih hnuaia loan late tan Mizoram sorkar chu guarantor-a a ṭan bakah, loan interest a rulhsak dawn avangin, ṭanpuina dawngtute hmalak dan uluk taka vil zui a nih dawn thu a sawi.

Meeting-ah hian dilna thehluhna portal ennawn niin, siamṭhat ngai laite sawiho a ni a; portal chu eng emaw chen tihdanglam a ngaih dawn avangin dilna thehlut tawh, ennawn tura portal-a la awm mekte chu portal thar hman theiha peih a nih hunah a thara thehluh a ṭul leh tur thu tarlan a ni.

Bána Kaih Scheme Phase-II kalpui leh hmain implementing department-a nodal officer-te tan DPR siamna application software hman dan training buatsaih dan tur sawiho a ni bawk.

Ṭhutkhawmah hian MSPCC member te, Mizoram Khadi & Village Industries Board (MKVIB), partner bank, Commerce & Industries department, Information & Commu-nication Technology (ICT) leh IPR department aiawhte an tel a ni.