National Handloom Day hman a ni; Hmun hrang hrangah Handloom Expo

Nimin kha National Handloom Day vawi 11-na a ni a, Mizoram hmun hrang hrangah hman niin, he ni pual hian Mizo puantah aṭanga thil siam chhuahte pho chhuahna buatsaih a ni.

National Handloom Day hi Commerce & Industries-a Handloom, Textiles & Handicraft Wing leh Ministry of Textiles hnuaia Weavers' Service Centre chuan Millennium Centre chung zawlah an hmang. Commerce & Industries secretary Dr Lalzirmawia Chhangte khuallian niin, Tourism director R Lalrodingi khualzahawm a ni a; puantah leh a kaihhnawiha sorkar laipui ruahmannate sawifiah a ni.

Handloom Day pual hian Millennium Centre chung záwlah State Handloom Expo (Hathkargha Mela) an buatsaih nghal a; Mizoram hmun hrang hrang aṭangin puah tahtute leh Mizo puan hmanga thawmhnaw leh thil chi hrang hrang siamtu ṭhahnem takin an kutchhuakte an pho chhuak. Expo hian August 10, 2025 thleng a awh ang.

Commerce & Indus-tries department leh Weavers’ Service Centre buatsaih vekin Zirtiri Residential Science College, Ramhlun South-ah National Handloom Day hman a ni a; minister Dr Vanlalthlana'n a hmanpui.

Khuallian hiaan puantah mi 30-te ni 45 chhung zirtirna tur Samarth Training a hawng a; hun rei tak puantaha inhmang tawh (veteran weaver)-te hnenah chawimawina a hlan bakah, puantah mi 21 hnenah National Handloom Development Programme hnuaia puantahna in sakna tur sum a hlan.

Dr Vanlalthlana chuan, Mizo puante chawi lâr leh puantahtute hamṭhatna a ngaih pawimawh thu a sawi a; Mizo puan design a danglam bik riau thu sawiin, "Hnam dangte mawi tih zawng a nih avangin ram páwna thawn chhuah a nih theih chuan a hnam ang leh a tahtute tan hlâwkna a ni dawn a, thawn chhuah dawn chuan international standard, export quality ṭhaa tah a ngai dawn," a ti a; hmasawn zel tura ṭan la turin puan tahtute a chah.

National Handloom Day hi kum tin August 4-ah India ram pumah Swadeshi Movement hriat reng nan hman ṭhin a ni a, hmanna pui ber Bharat Mandapam-ah President hoin hman a ni. Bharat Mandapam chhim tur hian Mizoram Commerce & Industries department chuan Mizorama puan tahtu mi panga a tír a ni. Sorkar laipui buatsaihin Janpath, New Delhi-a Handloom Haat-ah Exclusive Handloom Expo-ah Mizoram aiawhin Lapar leh Fungki te an inpho chhuak bawk.

Mizoram Handloom & Handicrafts Development Corporation Ltd. (ZOHANDCO) pawhin Handloom Day pualin Saituala Dorawta Hall-ah Handloom Exhibition an buatsaih a, minister of state Prof. Lalnilawma'n a hawng. Exhibtion-ah hian stall 30 siam a ni a, August 9, Inrinni thleng a awh ang.

Prof. Lalnilawma chuan, Mizo puante ram dangah hralhna a awm theih a beisei thu leh kawng zawn ni thei se a duh thu a sawi a; ZOHANDCO chairman Lalliansawta'n thu a sawi bawk.

Sailam cluster leh Tuirial cluster-ah pawh Handloom Day hman a ni a, Sailam cluster-ah bialtu MLA Baryl Vanneihsangi khuallian niin, Tuirial cluster-ah minister Dr Vanlalthlana khuallian a ni. Khualliante hian NHDP hnuaiah puantahtute ṭanpuina an sem.

NABARD Mizoram Regional Office leh Angel Business Promoters pawhin National Handloom Day pualin nimin khan Vanapa Hall kawtah Handloom Exhibition an buatsaih ṭan a; Mizoram hmun hrang hranga handloom firm 24-in an kutchhuakte an pho chhuak a ni.