KHAWTHLIR

Thisen pe

Helen Lowry College NSS leh Red Ribbon Club chuan nimin khan blood donation camp huaihawtin, Civil Hospital, Aizawl tan thisen unit 20 an pe a, petute mipa 15 leh hmeichhia panga an ni.

Hmalakna thlirho

Mizoram Social Defence and Rehabilitation Board (MSDRB) chu nimin khan an chairman Lalrinpuii, Social Welfare minister hoin an ṭhukhawm a, ruihhlo dona tura MSDRB hmalaknate an thlirho. MSDRB hi ruihhlo dona leh ruihhlo ngaite enkawl kawnga hma la tura Mizoram sorkarin kum 2015-a a din a ni.

AR-in meizial man

Assam Rifles sipaite chuan nimin khan Champhai daia Chhungte khuaah ram dang aṭanga lak luh meizial báwm pui (case) 69 leh báwm tê (carton) 10 an man a, cheng nuai 89.96 hû a ni.

Khatla S' P/S tlawh

Aizawl Municipal Corporation (AMC) Ward-14 bialtu corporator Ramthanzauvi chuan nimin khan a bial chhunga Khatla South Primary School a tlawh. Zirna kalpui dan, zirtirtu dinhmun leh sikul hmasawn dan turte sawiho a ni a; sikul hotute'n mamawh an thlente pek a tum thu Corporator chuan a sawi. Khatla South P/S-ah hian zirlai 44 leh zirtirtu pasarih an awm a ni. Ramthanzauvi hian Khatla South MUP hnenah MUP in sak tur puih nan Rs 50,000 a pe bawk.

Police awareness

Vaivakawn Police Station chuan nimin khan KM High School-ah awareness campaign an buatsaih a, zirlai 219 leh zirtirtu 17 an tel. Police-te hian ruihhlo leh mipat hmeichhiatna lam hawia pawikhawihna kaihhnawih dan chi hrang hrang an zirtir a ni.

Hnahthialah inelna

Samagra Shiksha, Hnahthial district chuan nimin khan Hnahthial district-a secondary (high) school zirlaite tan Hnahthial High School-ah 'Stop Diarrhoea Campaign 2025 Slogan/Poster Making Competition' an buatsaih. Intihsiak lawmman chu Independence Day lawmnaah sem a ni dawn a, pakhatnain Rs 5,000, pahnihnain Rs 3,000 leh pathumnain Rs 2,000 an dawng dawn.