Skill development training khâr

Labour, Employment, Skill Development and Entrepreneurship (LESDE) department-in Mizoram Building & Other Construction Workers Welfare Board (MBOCWWB) member-te tana skill development training an buatsaih chu nimin khan khâr a ni a; training zo mi 45 hnenah LESDE director John Ṭanpuia'n certificate a hlan.

Training-a telte hi Mission Foundation Movement hnuaia skill development program kaltlangin general duty assistant course (healthcare sector) zirtir an ni a; mi 45 zinga 14 chu private hospital leh home-based caregiver hna an thawk mek a, Japan-a kal turin mi pangain ṭawng an zir mek a, Singapore-a kal turin mi pariat an inbuatsaih mek bawk.

John Ṭanpuia chuan, zir chhuakte chu healthcare lama thawk tur an nih angin rawngbawlna rilru pu turin a chah a; Labour Law siamṭhat mek a nih thu leh labour reform-na tur point 12 chu Assembly session leha sawiho tura peih a nih thu a sawi.

Tarlan danin, MFM hnuaia skill development program kaltlangin mi 12,554 thiamthil zirtir an ni tawh a, chung zinga 7,342 chuan hna an hmu tawh. Healthcare sector bikah mi 1,500-in general duty assistant leh geriatric care-giver an zo tawh a, chung zinga mi 28 chuan Japan ramah hna an thawk mek a, Singapore leh Macau-a kal mi 100 chuang an awm tawh bawk.