Pathianni vawi 43 inkhawm tawh lo

Nimin kha kum 2021-a Pathianni hmasa ber a ni a, Covid-19 hripui léng vangin kohhrante an inkhawm thei lo chhunzawm zel a, Pathiannia inkhawm theih loh vawi 43-na a ni.

Nimin Pathianni kha kohhran páwl hrang hrangah sunday school hming ziah ní a ni a, mahse, Mizoram sorkarin inkhawm a la remtih loh avangin mipui náwlpui inkhawm a la awm lo a, sunday school hming ziah pawh tih theih a ni lo.

Mizoram Presbyterian Kohhran chuan sunday school hming ziah hi inkhawm theih hun hunah tih ṭan turin an ti nia thu dawn a ni. Hetih lai hian, pastor/minister insawn turte insawn a hun ṭan a, nimin khan biak-in eng emaw zatah chuan pastor chhuak turte thlahna hun hman a ni thung.

Mizoram hmun tam berah chuan Pathianni bikah March 15, 2020 kha biak-ina inkhawm hnuhnun ber ṭum a ni a; March 22, 2020-ah India ram pumah Janata Curfew neih niin, chuta ṭang chuan nimin thlegn khan kohhran inkhawm a awm tawh lo a, nimin kha March 22 aṭangin Pathianni vawi 43-na a ni.

Pathianni ni loah chuan March 18, 2020, Nilaini zanah kohhran eng emaw zat an la inkhawm a, chumi hnu lamah erawh chuan kohhran inkhawm a awm tawh lo.