Chhungkuaa chaw ei khawm an uar

Covid-19 léng avangin kum 2020 Krismas leh kum thar 2021 lawmna ruai kohhran anga ṭheh a ni lo a; chhungkhat laina, ṭhenrual ṭhate inko khawma chawhlui kîlho erawh Mizorama khawpui leh thingtlang khaw hrang hrangah an tam hle nia thu dawn a ni.

Mizorama hunpui hman zawh takah kohhran anga hman leh a lawmna ruai ṭheh theih a nih loh avangin kum dang zawng aiin chhungkhat lainá leh ṭhenrualte nena chaw ei khawm a hluara sawi a ni a; intihthawvenna atana chhungkua leh ṭhian hoa lui leh khawi emawa kalho an tam hlea sawi a ni bawk. Hengah hian social media hrang hrangah thlalak hmuh tur pawh a tam hle a ni.

Hetih lai hian, thingtlang hmun kilkhawr zawk ṭhenkhatah chuan kohhrana upa bial ang leh veng ṭhen tê deuh anga ruai buatsaih an awm nual nia thu dawn a ni bawk.