Myanmar aṭanga lut kuhva hâl ral

Indo-Myanmar ramri kaltlanga dan loa kuhva lak luh, thlai hrik pâi eng emaw zat chu Zokhawthara Plant Quarantine Station-ah January 1 & 2 khan hâl ral a ni.

India leh Myanmar nena insumdawn tawnna tura luhka atana ruat Zokhawthara point of entry ni lo, kawng dang aṭangin October 2020 aṭang khan dan loa kuhva lak luh a ni ṭhin tih hriat a ni a; sorkar official-te'n an enfiah zui nghal.

December 11, 2020 khan kuhva hrik zinga mi, thlai dang tichhe thei hmuh chhuah a ni a, chumi hnuah Champhai leh a chhelvela kudam 40 endikna zui niin, kudam palia kuhva rah dahte chu hrikin a ei chhia tih hmuh a ni.

Kuhva eitu hrikte chu thlai tana pawi thei a nih bakah, Indian bio-security tana thil pawi thlen thei a nih avangin kuhvate chu Zokhawthar hâl ral a ni ta a ni.