Bawlhhlawh paihtute SWMC panna kawng chhia siamin an hnatlang

Bawlhhlawh paih lirthei pawl, Aizawl City Carbage Vehicles Owners Association chuan nimin khan hnatlang an ko a, Aizawl bawlhhlawh paihna leh sawngbawlna, Solid Waste Management Centre (SWMC), Tuirial panna kawng chhia an thawm ṭha.

Aizawl City Carbage Vehicles Owners Association president Lalthanzuala sawi danin, SWMC hi NH kawngpui aṭangin metre 700 vela hla a ni a, kawng chu a chhiat nasat em avangin bawlhhlawh phur lirthei tam takin SWMC an thleng thei lo a, four wheel chauhin an thleng thei a ni. Hei vang hian nimin khan kawng thawm ṭhat hnatlang an ko ta a ni.

Hnatlangah hian bawlhhlawh phur lirthei laihâwl (MMV) 80 vel neitute leh lirthei tê (LMV) 70 neitute an hnatlang a; kawng chhuat phah tur lung an phur khawm a ni. Mizoram PWD mi leh sate leh Aizawl Municipal Corporation hotuten an pui bawk.

Tun dinhmunah SWMC kawng a chhiat em avangin bawlhhlawh ṭawih thei leh ṭawih thei lo te chu a hranga paih loin an bun fin mai ṭhin niin ACCVOA hruaitute chuan an sawi.