COVID-19: Mizoram dinhmun Hri kái zinga 97.73% chhuak tawh

January 2, Inrinni khan Mizoramah Covid-19 vei mi pali hmuh chhuah a ni a, natna (symptom) lang an awm lo a, mi pahnih chu Mizoram chhunga kái an ni. Nimin khan hripui laka fihlim tawh mi 16 chhuahtir an ni a, chhuak tawh zawng zawng chu mi 4,127 (97.73%) an ni.

Covid-19 vei hmuh chhuah tharte chu mipa leh hmeichhia pahnih ve ve an ni a; TrueNAT-PCR hmanga Lungleia hmuh mi pakhat leh, Rapid Antigen Test (RAT) hmanga Aizawl, Serchhip leh Lawngtlaia hmuh mi pakhat ṭheuh an ni. ZMC laboratory-ah damlo enkawltu mi 15-te swab sample endik ni mah se, hripui vei an awm lo.

January 2 khan ZMC laboratory-ah swab sample 15, TrueNAT-PCR hmangin district pasarihah sample 142 leh RAT hmangin district pasarihah sample 388 endik niin, a vaiin sample 545 a ni a; endik zat aṭanga hripui vei hmuh zat pali chu 0.73% a ni.

Sorkar thuchhuah tarlan danin, Lunglei Civil Hospital-a TrueNAT-PCR hmanga hmuh chhuah chu Lunglei Zotlanga mi kum 37, Kolkata aṭanga haw, quarantine facility-a awm mek a ni a, symptom nei lo a ni.

RAT hmanga hripui vei hmuh thar pathumte chu mipa kum 27 mi leh hmeichhia kum 9 leh kum 28 mi an ni a; hmeichhiate hi tualchhunga hri kái ve ve niin, mipa erawh chu state páwn aṭanga rawn lut a ni thung.

Nimin khan Covid-19 laka fihlîm tawh mi 16 chhuahtir an ni a; State Referral Hospital, Zokhawsang CCC leh Saitual CCC aṭangin mi pakhat ṭheuh, Tribal Art Centre CCC aṭangin paruk, Durtlang BSUP CCC aṭangin mi panga leh Kolasib SIRD CCC aṭangin mi pahnih an chhuak.

Mizorama Covid-19 vei mi 4,223 hmuh chhuah tawhte chu mipa 3,103 leh hmeichhia 1,120 an ni a; nimin tlai dar 5 thleng khan damin mi 4,127 (97.73%) chhuahtir an ni tawh a, mi pariat (0.19%) thi tawhin, enkawl mek mi 88 (2.08%) an awm. District pali - Siaha, Mamit, Saitual leh Khawzawl district-ahte Covid-19 positive an awm tawh rih lo.

January 1, 2020 thlengin Mizoramah swab sample 1,81,166 endik a ni tawh a, chu'ng aṭanga Covid-19 positive hmuh chhuah tawh 4,223 chu 2.33% a ni.

Mizorama Covid-19 positive hmuh chhuah tawh mi 4,223 zinga mi 2,001 chu Mizoram chhunga kái an ni a, mi 2,222 chu state páwn aṭanga rawn lût an ni thung.

RAT hmanga hmuhte:

Bethlehem Vengthlang - 1: Hmeichhia kum 28, Zohmun khua, Bethlehem Vengthlangah a khawsa mek. nau pai a ni a, nau nei tura private hospital-a a kalnaah Covid-19 positive tih hmuh chhuah; hri kàina hriat loh, symptom nei lo.

BSF, Serchhip - 1: BSF 60 Bn sipai mipa kum 27, tun hnaia Assam aṭanga rawn lut, Dawngzawl camp-a awm mek, symptom nei lo.

Lawngtlai Electric Veng - 1: Hmeichhia kum 9, tualchhunga hri kái, a kàina hriat, symptom nei lo.