CM-in Mizorama hna thawktute a kâwm

Chief minister Lalduhoma chuan August 7, Ningani khan Delhi Mizoram House-ah Aizawla PM Ekta Mall satu tura thlan HLL Infra Tech Services (HITES) hotute koin, hna an thawh dan tur a sawipui a; Aizawla RIPANS an sak mek chu a hun taka zo ngei turin a chah.

PM Ekta Mall satu tura thlan HITES hi Ministry of Health & Family Welfare hnuaia public sector urdertakings an ni a; August 23, 2025 khian a sakna tur lung phum tura ruahman niin, lung phûm zawhah sak ṭan nghal a ni ang.

CM Lalduhoma chuan, PM Ekta Mall chu a hun taka sak zawh tum tur leh ṭha taka sa turin HITES hotute a chah a; tuna Aizawla RIPANS an sak mek pawh a hun taka zo ngei turin a hrilh bawk.

Chief Minister hian North East Centre for Technology Application and Reach (NECTAR) director general Dr Arun Kumar Sarma pawh a kâwm a, PM DevINE hnuaia Buangpuia changel sawngbawlna project an kalpui mek a sawipui. Changêl sawngbawlna project chu chak taka thawh a nih theih dan tur an sawi dun a ni.