Governor-in Lunglei khawpui a tlawh

Governor Gen. Dr Vijay Kumar Singh chuan nimin khan Lunglei a tlawh a; sorkar department hotu te, tlawmngai pawl, kohhran leh ex-servicemen hruaitu te, 20 Assam Rifles sipaite a kawm bakah, War Memorial-ah sipai martarte zahna lantir nan pangpar a dah.

Lunglei DC conference hall-a sorkar hotute a kawmnaah Larsap chuan, DC office kaltlanga ngaihsak ngai zual miretheite thleng pha scheme ṭha tak tak kalpui a ni chu entawn tlak a tih thu a sawi a, DC office pan harsat mipui tan remchang siamsaka an harsatnate chinfelsak zel turin a chah.

Gen. VK Singh chuan, sorkar laipuiin zirna tihhmasawn nan sum tam tak a sêng tih swiin "Mizoramah sikul ṭha tak tak - Eklavya Model Residencial School, Kendriya Vidyalaya leh Jawahar Navodaya Vidyalaya te mi tin ban phaka chhawp chhuah a ni a, hengte hi ṭhalaite'n central service-a inziah luh nan chhawr ṭangkai tum se ka duh," a ti.

Hmeichhia, naupang, ṭhalai, loneitute leh miretheite tan sorkar laipuiin scheme ṭha tak tak a siam thu sawiin Larsap chuan, "Hengte hian hamṭhatna dawng tur dik takte a thlen theih nan theihtawp chhuah u la, a ṭulna apiangah kaihkawpa thawhhona ṭha nei turin department hotute ṭan la ang che u," a ti a; dan leh thupek kenkawh leh ruihhlo do kawngah khawtlang huapa ṭanrual a ṭul thu a sawi.

Governor chuan, tlawmngai pawl leh kohhrante chu dan leh thupek kenkawh leh ruihhlo donaah sorkar thláwp zel turin a sáwm a; Mizoram ṭhenawm ram leh a chhehvela thil thlengte ngaihvena beng chhit reng a ṭul a sawi bawk.

Lunglei SP J Lalmuankima chuan, kumin 2025-ah July thla tawp thlengin BNS 2023 hnuaiah thubuai 89 leh dan dangte hnuaiah thubuai 127 ziah luh a nih tawh thu a sawi a; heroin gam 1625.88 man kaihhnawih thubuai 13 (Rs 48,66,450 man hu) leh ralthuam kaihhnawih thubuai pahnih ziah luh a nih tawh thu a sawi.

Lunglei additional DC Rochuangkimi Khenglawt tarlan danin, Healthy Lunglei District Campaign hmangin mipui hrisel zawk nan natna inkai chhâwn theih loh zawn chhuah beihpui thlakna (camp) ṭum 39 neih a ni tawh a, vohbikte tan Project LEAP kalpui niin, Lunglei district-a khaw parukah Good Governance Campaign- Prashasan Gaon Ki Ore (I kawtkaiah sorkar) kalpui a ni tawh. Aspirational RD Block Lungsenah raipuar leh naupangte hrisel nan Project BLOOM kalpui a nih bakah, Elementary English Literacy Programme kalpui mek a ni.