UDPA Minister-in college debate a hmanpui

Mizo Zirlai Pawl leh Urban Development & Poverty Alleviation (UDPA) hnuaia Swachh Bharat Mission (Urban) chuan August 5-6, 2025 khan college zirlaite pualin debate an buatsaih a, UDPA minister K Sapdanga hmanpuiin, lawmman a sem.

Inter-College Debate Competition hi Chanmari YMA Hall-ah buatsaih a ni a, zirna-in paruk aṭangin zirlai 12 an tel. NIELIT zirlai Jire Lalfakawma, pakhatna niin, Pachhunga University College zirlai PC Lalringzuala leh Aizawl College zirlai Samson Lallawmkima te pahnihna leh pathumna an ni.

Debate thupui chu, 'Khawpui fai nei turin faina kawnga inzirtir (awareness campaign) aiin sorkarin dân a kenkawh ṭhat a pawimawh zawk' tih leh, 'Ṭhalaite'n faina kawnga hma an lak hi sorkar hmalakna aiin mipuiah a tla na zawk' tih a ni.

Minister K Sapdanga chuan thu sawiin, "Fai kan duh a, ṭhenkhatin fai kan la peih si lo. Bawlhhlawh motor leh mi hmuh phak lohah a rûka bawlhhlawh paih chîng kan la awm a, a zialo hle a ni," a ti a; fai duhna thinlung nei turin zirlaite leh mipui a sáwm.

District khawpui hrang hrangah solid waste management centre siam mek a nih thu sawiin K Sapdanga chuan, "Mizoramah thil thar Material Recovery Factory, Luangmualah siam mek a ni a, hetah hian plastic kan paih mai mai ṭhinte sawngbawl a, thil dang siam chhuah leh nan hman thei tura ruahman a ni," a ti.

MZP president H Lalthianghlima pawhin thu sawiin, ṭhalai thluak fîm zawk, politics tui nûin a la chiah lohte ram siamṭhatna ke pên turin a sáwm a; Mizoramin kawngpui vangin buaina namenlo a tawk ṭhin tih sawiin, political party-te'n politics khelh nan kawngpui hmang lo se a duh thu a sawi bawk.