Smart meter vuah man pek a ngai lo

Power & Electricity department chuan electric meter hman lai mekte smart meter-a vuah/thlak chungchangah hriattirna a tichhuak a; smart meter vuah/thlak man pek a ngaih loh thu leh identity card card nei loa meter thlâk tum an awm chuan PE department-ah hriattir turin mipui a chah.

PE department chuan, sorkar laipui thu angin electric meter hman mek chu pre-paid leh post-paid atana hman kawp theih smart meter-a thlak vek tur a nih thu an tarlang a, "Mizoramah smart meter vuah ṭan a ni tawh a, Satnam Global Infra Project-te’n an thawk mek. Meter thlak tura lokalte hian ID card an nei ngei tur a ni a, ID card nei loa meter thlak tum an awm chuan PE department-ah hriattir vat tur a ni," an ti.

Meter thlak man mipuiin an pek a ngai lo tih tarlangin PE department chuan, "Meter thlak man dil an awm a nih chuan department office-ah a rang lama hriattir tur a ni. Meter thlaktute hian meter thlak chauh an hna a ni a, consumer-te electric wiring an khawih danglamsak a thiang lo," an ti a; consumer-te’n electric wiring tihdanglam an duh a nih chuan electric wiring ti thei a hrana chhawr tur a nih thu an tarlang.

POWER & ELECTRICITY NGENNA

◆ Smart meter hi sang lutuk emaw, hniam lutuk emawah vuahtir loin, a theih chuan mit zâwn (eye level)-ah vuahtir ni se.

◆ Tluang taka meter thlak a nih theih nan leh consumer number leh consumer hming dik taka chhinchhiah a nih theih nan meter thlaktute hnenah electric bill hlui/thar hmuhtir ni se.

◆ Electric bill hmuhtir tur kan kawl ṭha tawh lo a nih pawhin PEDM Consumer app aṭangin a download theih a ni.