Natna chi hrang 248 enkawl dan tarlanna lehkhabu tlangzarh a ni

Natna chi hrang hrang 248 nihphung leh enkawl dante tarlanna lehkhabu Standard Treatment Guidelines 2025 siam thar chu Health & Family Welfare minister Lalrinpuii'n nimin khan a pisaah a tlangzarh.

Health Minister chuan, India rama state nazawngin anmahni puala an neih theih loh Mizoramin Standard Treatment Guidelines 2025 a nei thei chu ropui a tih thu a sawi a, "Mizoram hmun kilkhawr ber thlenga natna hriat leh enkawlna kawnga kan doctor-te leh hriselna lama thawktute'n ṭangkai taka an hman ngei ka beisei," a ti.

Inkhawmah hian Standard Treatment Guidelines 2025 buatsaih a nih dan Dr Vanlalhruaii, Core Committee on STG secretary-in a sawifiah a; HFW principal director Dr Lalthlengliani leh National Health Mission mission director Dr Lily Chhakchhuak te pawhin thu an sawi.

Standard Treatment Guidelines 2025 siamna tura expert team-ah mi 19 an awm a, Zoram Medical College & Hospital aṭangin mi 13, Civil Hospital Aizawl aṭangin pathum leh, Kulikawn Sub-District Hospital, Hospital and Medical Education leh Mizoram State Health Care Society aṭangin mi pakhat ṭheuh an tel.

Guidelines bu-ah hian natna hrang hrang 248 nihphung leh enkawl dan ziah a ni a, specialist doctor hrang hrangte'n India leh khawvel huapa mithiamte siam aṭanga Mizoram mil leh mamawh tur ang bera an duan a ni. Lehkhabu bakah hian, online aṭanga en theih tura duan a ni bawk.