Mizoram Kailawn 4th Edition tlangzarh; Mizoram Kailawn kaltlangin mi 60 pui tawh

Adviser to CM (Handholding) Dr KC Lalmalsawmzauva chuan nimin khan a pisaah Mizo ṭhalaite'n ngaihtuahna thar hmanga an intodelhna tur leh mi dang tan pawha eizawnna ṭha an siam theihna tura inelna, Mizoram Kailawn 4th Edition a tlangzarh. Mizoram Kailawn kaltlangin ṭhalai 60 hnenah eizawn bulṭanna tur pawisa pek a nih tawh thu tarlan a ni.

Mizoram Kailawn hi Planning & Programme Implementaton department hnuaiah kum 2017 khan kalpui ṭan a ni a, kum 2018 leh 2019-ah kalpui chhunzawm niin, kum nga hnuah kumin hian a ṭum li nan kalpui a ni leh dawn. He inelna kaltlang hian mi 60 hnenah eizawnna bul ṭanna tur pawisa pek a ni a, an thiamna tuai hriam nan training neihpui an ni ṭhin.

Kumin Mizoram Kailawnah hian mimal leh pawl angin tel theih a ni a, dilna luh dan azirin presentation ṭha zual 30 thleng thlan chhuah a ni ang a, thlan chhuahte sum mamawh chu Rs 1,00,000 thleng pek a ni ang. An hmalaknate tihchangtlun lehzual nan MSUM Research & Development and Market Support Fund aṭangin Rs 2,00,000 thleng dilna an siam thei dawn bawk.

Dr KC Lalmalsawm-zauva chuan, Mizo ṭhalaite zingah thiamna chhawr tlak nei leh ruahmanna thar ngaihtuah chhuak thiamte kaih chhuahna turin Planning department-in ṭum thum Mizoram Kailawn a buatsaih tawh a, ṭhalai eng emaw zatin an ṭangkaipui tawh tih a sawi a; intodelhna kawngah te, mi dang tana eizawnna siam theihtu ni tel hmasawnna thlen thei ruahmanna thar ngaihtuah chhuaktu ni turin Mizo ṭhalaite a sawm a ni.