Hmasawnna hnathawh viltu tur CM kaihhruai Mi-PRAGATI din

Mizoram sorkar chuan tun hnai khan sorkar laipui leh state sorkar project pawimawh zualte a hun takah zawh a nih theihna atana viltu tur Mi-PRAGATI a din.

Mi-PRAGATI hi sorkarin hmasawnna tur project a neihtea hnathawh chin enpui a, harsatna an neihte sukiang a, hnathawh muan chante zirchianga viltu tur a ni. Chief Minister-in a kaihruai dawn a, member secretary chu Chief Secretary a ni.

Mi-PRGATI member atan state sorkara principal secretary, secretary, deputy commissioner leh Mizorama sorkar laipui department/agency-a state head-te ruat an ni a; video conferencing hmangin ṭhutkhawm ṭhin tur niin, Chief Minister-in principal secretary, secretary leh DC-te a kâwm ṭhin dawn a ni.

MI-PRAGATI TIH TURTE

■ Secretary leh DC ten thla tin Thawhṭanni hmasa berah project-te ṭul leh pawimawhte nen an thehlut (upload) ṭhin ang.

■ Secretary leh DC ten thla tin chawlhkar hnihna Thawhlehni apiangin an ngaihdan leh ṭul leh harsatna awmte an thehlut ṭhin ang.

■ Thla tin chawlhkar thumna Ningani tlai dar 3-ah ṭhutkhawm ṭhin tur a ni.

■ Mizoram chhunga project, cheng vbc. 50 chin chung lama hmalakna leh hnathawh dante sawiho ṭhin a ni ang.

■ Project reng reng department thawhho ngai emaw, central lam nena thawhho ngai a awmte thlirho ṭhin a ni ang.

■ Chief Minister hoa meeting apiangin project panga aṭanga paruk a pawimawh dan indawtin sawiho ṭhin a ni ang.

■ Meeting-ah hian hnathawh zawh hun, hna quality leh a sensote ngaih pawimawh a ni dawn.