Tourism buatsaih thawnthu insawisiakah Serchhip district aiawhte an thiam ber

Tourism department-in kumin June thla vel aṭanga 'Narrating Mizoram: A Tales of Our Land' tih thupui hmanga chanchin insawisiak, 'Storytelling Competition' an buatsaihah August 8, 2025 zan khan Ignite Studio, Aizawlah Grand Finale buatsaih a ni a, Serchhip district aiawha telte pakhatna an ni.

Storytelling Competion vawi khatnaah hian district 10 aiawh mi 15 an tel a; pakhatna, Serchhip district aiawha telte chu Lalruattluanga leh Lalthanzami Chhangte an ni a, lawmman atan Rs 50,000 leh thuchei an dawng.

Saitual district aiawha tel Deborah Lalnghakmawii leh Esther Lalmalsawmi te pahnihna niin, lawmman Rs 30,000 an dawng a; Khawzawl district aiawha tel H Lalngurliana leh R Lalhlimmawii ten Rs 20,000 an dawng. Top 3-a lang lo district dang pasarih aiawha telte hnenah participation prize Rs 6,000 ṭheuh hlan a ni a, kawng ping avangin Lawngtlai district aiawh an tel thei lo.

Intihsiak hmâwrbâwknaah hian Tourism minister Lalnghinglova Hmar khuallian a ni a; Minister chuan, intihsiakna chu MIzoram hmun hrang hranga hmun mawi leh chanchin nei ṭhate mipuite'n an hriat chian lehzuial theihna tura buatsaih a nih thu sawiin, zinmite hîpna kawngah hmasawnna a thlen ngei a beisei thu a sawi.

Lalnghinglova Hmar chuan, kuminah Tourism department-in kût (festival) hrang hrang a buatsaih leh dawn thu a sawi a, "Kan ram, kan hnam leh kan hmunhma chanchinte ngaihnawm taka mi dang hnena kan sawi thiam chuan a ngaithlatute thinlungah a taka hmuh ve châkna a tuh a, chu chu kan rama tourism tihhmasawnna turah thil pawimawh tak a ni," a ti.

Tourism director R Lalrodingi pawhin thu sawiin, Storytelling Competition chu district level-ah buatsaih hmasak a nih thu sawiin, district lama lo buatsaihtu DC pisate leh sorkar department dangte chungah an lawm thu a sawi a; tourism tihmasawn turin Mizoram leilung hausakna, a hmélhmang danglam bikte leh zimmite tana service pek theihte pho chhuah tam a pawimawh thu a sawi.