KHAWTHLIR

KṬP-in thisen pe

August 9, Inrinni khan KṬP, Venghnuai Bial chuan ZMCH tan thisen unit 77 an pe a, petute mipa 67 leh hmeichhia 10 an ni. KṬP, Thenzawl Field Veng Bial pawhin Lunglei Civil Hospital tan Thenzawl Hermon NPSS Hall-ah thisen unit 54 an pe a, petute mipa 40 leh hmeichhia 14 an ni.

MLA-in tlawh

Lunglei South bialtu MLA Lalramliana Papuia chuan August 9, 2025 khan a bial chhung Bualte khaw daia leiminna hmun a tlawh a, khualzin tangkhangte ei atan Bualte leh Ṭhualṭhu khawtlang hruaitute hnenah alu ip khat ve ve a hlân. Lalramliana chuan, sorkarin khualzin tangkhangte'n harsatna an tawh loh nan leh ṭha taka kawng a tlang theih nan theihtawpin hma a lak thu a sawi.

Naupang/tleirawl 5,711 pek tum

Saitual district Chief Medical Office conference hall-ah tun hnai khan National Deworming Day (NDD) August round neih tura thil pawimawh zirhona buatsaih a ni a, Saituala sikul hrang hrang zirtirtute an tel. NDD February round-ah naupang leh tleirawl kum 1-19 inkar rûlhût hlo pek tura ruahman zinga 99.32% hnenah pek a nih thu an tarlang a; August round-ah naupang/tleirawl 5,711 hnenah pek leh tum a ni.

Tlang kawngah MMV tlân theih loh

Aizawl SP Rex Zarzoliana Vanchhawng leh Kolasib SP David H Lalthangliana te chuan, August 8, 2025 aṭanga thuleh awm hma chu Durtlang-Kawnpui inkar kawngah medium vehicle (MMV) tlân khap a nih thu leh, MMV-te chu Sairang kawng (NH-06) lamah tlan tur a nih thu an tarlang. Thuchhuah chungchanga harsatna tâwk leh sawi tur neite tan Sairang Police Station OC phone number 9774722968 leh Kawnpui PS OC phone number 9366352665-ah biak tur a nih tur an tarlang bawk.

CM-in ṭanpui

Chief minister Lalduhoma Delhi zin chu August 9, Inrinni khan a rawn haw. CM hian Lengpui Airport aṭanga Aizawl a pannaah Tlawng luia tla Lalsiamthari Sailo ruang zawnga hnatlangte a tlawh haw nghal a, hnatlang ei leh in senso atan Rs 10,000 a pe a ni.