CCM-in Saitualah seminar a buatsaih

Mizorama kohhran hrang hrangte thawhhona tura din Council of Churches in Mizoram (CCM) chuan August 9, Inrinni khan Saitual Presbyterian Kohhran Gospel Centenary Hall-ah CCM chungchang zirhona (seminar) an buatsaih a, CCM member kohhrante aṭangin palai 113 an tel.

CCM seminar vawi 5-na hi president Rev. Dr R Lalbiakliana'n a kaihruai a, general secretary Rev. Dr Lalhmangaiha'n 'CCM lo pian chhuah dan leh hma lam thlirna' tih thupui sawiin, zirho nghal a ni.

Seminar paper behchhanin - 'CCM hi kohhran mipuite'n kan hriat tlan theih nan eng programme nge siam ṭhin ila ṭha ang?' tih leh, 'CCM-in common project a neih tura ṭha engte nge ni ang?' tihte sawiho a ni bawk.

CCM hi October 27, 2024 khan Mission Veng Kohhran biak-inah din a ni a; tunah hian kohhran pawl pakua - Mizoram Presbyterian Kohhran, Baptist Church of Mizoram, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran (Bualpui Ng), Independent Church of India, Wesleyan Methodist Church leh Zomi Baptist Church an tel a ni.