Hulhliap - Short Stay Centre thawh 2-na camper-te an chhuak

Ruihhlo ngaite chhan chhuahna tura tisa leh thlarau lama enkawlna, Hulhliap Short Stay Centre thawh hnihnaa chu August 9, Inrinni khan zawh a ni a, camper-te'n Synod Revival Camping Centre, Neihbawih chhuahsanin, mahni hmun lam an pan.

Hulhliap Short Stay Centre hi Mizoram sorkar, Mizoram Synod leh tlawmngai pawlte'n ruihhlo vanga harsatna neite enkawlna tura an buatsaih a ni a; batch hnihna hi July 21, 2025 khan ṭan niin, ruihhlo ngai mipa vek mi 548 an lut a, a tawp thlenga awm chu mi 248 an ni.

Camper chhuak tate chu volunteer/counsellor-te'n an vil zui dawn a, thiamthil zir duh an awm chuan sorkarin hmalakpuina tur a ruahman. Centre-a awm zui duhte chu dah luh an ni bawk.

Hulhliap Short Stay Centre-ah hian ruihhlo ngaite chu a tir lam ni 10 chhung chu ruihhlo zungzámin an taksa a tihbuaina tihreh nan damdawi hmangin enkawl an ni a; chumi hnuah ni nga chhung psychologist-te'n an enkawl a, chumi hnuah ni nga dang Synod Revival speaker-te'n Pathian thu hmangin an kaihruai leh bawk.

August 25, 2025 khian Hulhliap Short Stay Centre thawh thumna ṭan leh tum a ni.