Kut hnathawktute tan thâ thlah loa hma la turin Larsapin official-te a chah

Governor Gen. Dr Vijay Kumar Singh chuan nimin khan Serchhip a tlawh a, sorkar hotu te, tlawmngai pawl leh kohhran hruaitute leh ex-servicemen member-te a kâwm. Sorkar hotute chu kut hnathawktute tan thâ thlah loa hma la turin a hrilh.

Serchhip DC pisa hall-a sorkar department hotute nen an inkawmnaah Larsap chuan, sorkar laipuiin mipui dâwm kân nan scheme ṭha tak tak a siam thu a sawi a, "Tribal tana duan scheme-te zir chiang a, mamawhtu dik takte'n an chhawr ṭangkai theih nan ṭan lak a pawimawh," tiin, kut hnathawktute tan thâ thlah loin hma la turin a chah a ni.

Governor chuan, ruihhlo hluar vangin pawikhawihna a punlun thu sawiin, ruihhlo donaah ṭanrual a ṭul thu a sawi a, "Ṭhalai, nakina kan ram inghahna turte hi ruihhlo laka chhan chhuak turin theihtawp kan chhuah tlan a ṭul," a ti.

Mizoram, India rama ziak leh chhiar thiam tamna ber a nihna chu zirlaite chher hriam nan leh chhawr tlaka siam nana hman tum tur leh, central service-ah Mizo tam zawk an luh theih nana theihtawp chhuah turin sorkar official-te a chah bawk.

Serchhip DC Paul L Khuma tarlan danin, Bána Kaih (Handholding) scheme kaltlangin Serchhip district-ah sawhthing quintal 8,845.28 lei a ni a, loneitute bank account-ah Rs 4,20,64,748 thun a ni tawh.

Dan leh thupek kenkawh kawnga hmalaknate Serchhip SP Gavit Gogna-in a tarlang a; Serchhip district-ah Myanmar raltlan 647 leh Bangladesh raltlan 266 an awm mek a, Myanmar raltlan zinga 132 chu biometric enrolment tih tawh an ni.

Kuminah July thla tawp thlengin Serchhip district-a pawikhawihna thleng zinga 41% vel chu mi in rawk a ni a, rûkrûk 22% leh thil dang dang 37% a awm. Thla sarih chhungin police-in heroin gram 127.29, rakzu litre 1,286 leh urea ip 300 an man.

Governor hian Serchhipa 14 Assam Rifles headquarters leh Shalom Special School bakah, Chhingchhipa Sainik School a tlawh a; sipai hotute leh zirlaite a kâwm a ni.