National Deworming Day hman a ni

India ram pum huap rúlhût do beihpui thlakna, National Deworming Day (NDD) August round chu nimin khan Mizorama district tinah buatsaih a ni a; anganwadi centre leh sikul hrang hrangah hun hman niin, zirlaite hnenah rúlhût hlo (albendazole) pek a ni.

Sorkar chuan kum tin naupang/tleirawl kum 1-19 inkarte chu ṭum hnih a thlâwnin rúlhût hlo a pe ṭhin a; kum 2 hnuai lamte chu mûm chanve pek ṭhin niin, kum 2-19 inkarte chu mûm khat pek an ni ṭhin. NDD tum ber chu rúlhût vanga naupang thisen tlachham leh hrisel lohna hrang hrangte tihbo a ni.

NDD August round hi August 11-18, 2025 chhungin neih a ni dawn a, district tina sorkar/mimal sikul leh anganwadi centre hrang hranga kum 1-19 inkarte hnenah rúlhût hlo pek tur niin, sikul kai lote chu accredited social health activist-te'n an inah kal chilhin an pe dawn ani. Hmaih palhte tan a thual nawnna (mop-up day) August 18, 2025-ah neih tur a ni bawk.

Aizawlah chuan Aizawl East CMO bultumin Central Higher Secondary School-ah NDD hman a ni a; chief medical officer Dr Lalhlunpuii'n kaihruaiin, PHE executive enginer Samuel Ralte-in a hmanpui. Women and Child Development leh School Education department hotute leh ANM School, Zemabawk an tel a; sikul naupangte chu rúlhût hlo eitir a ni.

Lungleiah chuan Chanmari High School-ah NDD August round hawnna a ni a, additional DC Rochuangkimi Khenglawt-in a hmanpui. Tun ṭumah hian Lunglei leh Hnahthial district chhunga kum 1-19 inkar mi 56,358 hnenah rúlhût hlo pek tum a ni.

Champhaiah chuan GM High School-ah hman niin, district education officer K Lalsiamliani'n a hawng. Mamitah chuan Mamit Middle School III-ah district education officer K Lalnunfela hoin hman ṭan a ni a; Saitualah chuan Saitual High School-ah additional DC Lallawmawma hoin hawn a ni. Khawzawlah pawh Vengthar Presbyterian English School-ah hman niin, bawrhsap K Vanlalthiana'n a hmanpui.