Women’s Polytechnic-in zirlai tharte lawm

Women’s Polytechnic, Aizawl chuan nimin khan an hmunah zirlai lut tharte lawmna Freshers’ Social an hmang a, Health & Family Welfare minister Lalrinpuii'n hmanpuiin, zirlaite chu an thil zirte eizawnna tlaka thiam turin a fuih.

Zirlai tharte lawmna inkhawm hi Women’s Polytechnic principal B Lalhmuakluaia'n a kaihruai a; Lalrinpuii chuan, zirlai lut tharte tan Women’s Polytechnic chu hmasawnna bul ṭanna a nih ngei a beisei thu a sawi a, "Khawvel hi a chak apiang emaw, a fing apiang emawte hlawhtlinna ni loin, hun inher danglam zel mila inher rem thiamte dinchhuahna a ni," a ti.

Minister chuan, Women Polytechnic zirlaite chu an thil zirte eizawnna tlaka hmang thei khawpa turin thiam tur te, ruihhlo leh HIV laka fihlim tur te, chhungkua leh khawtlang tan mi ṭangkai leh rintlak nih tum turtein a chah a; zirtirtute chu ram leh hnam tana mi puitling chherchhuaktu ni turin duhsakna a hlan bawk.

Women's Polytechnic-ah hian kum thum chhunga zir theih diploma course pali - modern office practice (MOP), electronic & telecommunication engineering (ET), garment technology (GT) leh beauty culture & cosmetology (BCC) a awm. MOP zir turin pawl 12 pass a ngai a, course dang pathum ET, GT leh BCC-te chu pawl 10 pass tan zir theih a ni.