Police-in meth leh heroin an man

Mizoram Police-a CID (Crime) hnuaia Special Narcotics Police Station leh CRPF ṭang dun chuan August 9, 2025 khan Seling leh Bung Bangla bulah Alto K10 car AS-10 D-9577 aṭangin methamphetamine kg 3.930 an man.

Methamphetamine tawlhrûknaa inhnam-hnawiha puh mi pathum - Sahab Uddin (41), Kanishail, Karimganj District, Assam leh, Khawzawl district-a Hmuncheng khaw mi Emanuel Remnalalliana (25) s/o Lamthanga leh Lalbiaksiama (23) s/o Ramdinliana (L) te an man a; Special Narcotics PS-ah thubuai ziah luh a ni.

Champhai Police-te pawhin August 6, 2025 khan Khankawn checkgate-ah lirthei pakhat aṭangin heroin hawng 88 (kg. 1.053) an man. Chhui zuinaah heroin thawntu chu Agnes Lalremsiami (32) w/o Lalramsiama, Vaphai a ni tih hriat niin, man nghal a ni a; Champhai Police Station-ah thubuai ziah luh a ni.

CID (Special Branch) chuan August 1, 2025 khan Zemabawk leh Seling inkarah pick-up truck MZ-01 X-5782, B Lalṭhazuala (45) s/o T Johana, Republic Veng khalh aṭangin crystal methamphetamine kg. 20.304 leh heroin kg. 1.625 (hawng 120) an man. Ruihhlo tawlhruka mawhphurtu bera puh Bawilianthang (42) s/o Khuangling, Tahan C group chu August 1 vek khan an man bawk.