Zirtirtu chawimawina dawng tawhte an awmna hmunah chawimawi rêl

School Education minister Dr Vanlalthlana hoin nimin khan State Working Committee for Celebration of Teachers' Day chuan September 4, 2025-a Zirtirtute Ní (Teachers' Day) hman dan tur an ngaihtuah a; Teachers' Day-ah hian zirtirtu chawimawina dawng tawhte pualin anmahni khua/vengah chawimawina hun buatsaih an rel.

Dr Vanlalthlana chuan, zirtirtute chu naupangte seilenna kawngah kaihruaitu pawimawh tak an nih thu a sawi a, "Naupang chu a tettê aṭanga zirtirtu ṭhain zaidawh tak leh awmze neia a enkawl chuan a hlawhtlinna kawng a awlsam bik tih zirmite’n an fiah tawh," a ti a, Zirtirtute Ní hmanna aṭangin zirtirtu hna chawisan a nih zel theih a beisei thu a sawi.

State Working Committee chuan, zirtirtu chawimawina dawng tawhte tan anmahni khua leh vengah chawimawina hun siam ni se, an ti a; zirtirtu damlo leh natna khirh bik tuarte ṭanpuina National Foundation for Teachers Welfare (NFTW) Fund-a pawisa thawh zat chu Rs 200 aṭangin Rs 300-ah tihsan an rel bawk.

Ṭhutkhawmah hian School Education special secretary David Lalthantluanga, director Angela Zothanpuii leh School Education hotu dang te, Aizawl DC aiawhte leh zirtirtu pawl hrang hrang aiawhte an tel a ni.