Kawnpui-Sairang kawng siam PWD hotute'n an vil ngawrh

Mizorama national highway enkawltu NHIDCL leh an hnuaia contractor-te chuan NH 306 & 06 kawngpui chhe laite an thawm ṭha zui zel a, Mizoram PWD hotute chuan viltu tur bik officer inruatin, kawng thawm ṭhat hna thawh mek uluk takin an vil.

Thu dawn danin, PWD ruahman angin nimin khan PWD SE R Zirsangliana'n Kawnpui leh Sairang inkar kawng siam mei a vil a, vawiinah chief engineer (highway) Robin Lalrinawma'n a vil ang. Tun kar chhung bik atana an ruahman dan chuan, naktukah SE Lalrinngheta, Ninganiah CE David Sapzova, Zirtawpniah SE H Lalnghinglova, Inrinniah SE Vanlalzuala Chenkual leh Pathianniah E-in-C H Zoramliana ten an vil dawn a ni.

Hei bakah hian, PWD NH Division-III leh Kolasib Division-a EE/SDO-te chu englai pawha awm chilhtu indah tura tih an ni a, Mega Food Park-ah ṭhuthmun (station) an siam. SE HP Zothankhuma chu tun kar chhung zawng Kawnpuia awm chilh tur leh SE Eddie C Zothansanga chu Mega Food Park-a awm chilh tura tih an ni bawk.