BJP aṭang lo chuan hmasawnna a awm thei lo tih a chiang - BJP MLA

Palak bialtu MLA K Hrahmo chuan nimin khan Aizawla BJP pisaa inkhawmah thu sawiin, BJP aṭang lo chuan hmasawnna a awm thei lo ti a lang chiang niin a sawi.

K Hrahmo chuan, India ramah national party paruk an awm tih sawiin, "A dang zawng chu regional party an ni. Tun hunah hian national party BJP aṭang lo chuan development a awm thei lo tih hi kan hre chiang ta hle a ni," a ti.

BJP MLA chuan, MNF-te chu 'NDA kan ni,' inti chunga NDA tak taka inhnim phûm duh lo an nih thu sawiin, "MNF-te'n sorkarna an siam lai khan NDA-a awm tak tak ni se chuan Mizoramah harsatna khatianga nasa kha kan tawh a rinawm loh a, SEDP aṭanga sem tur cheng nuai 3 pawh kha an neih a rinawm a ni," a ti a; tunah chuan NDA-ah an inham tâng hram hram niin a sawi.

K Hrahmo chuan, ZPM chu NDA-a tel turin central-a BJP hruaitute'n an dàwr nia sawiin, "Tun sorkarah NDA-a tel tura central hruaitute'n ZPM an dàwr lai khan an zawm duh lo a, chumi rah chu kan seng mek. Issue base-in kan kal dawn an tih ang khan issue base chuan an kal ta a, chutiang bawkin Central pawh hian issue base thoin min enkawl niin a lang," a ti.