Kuminah chawa intodelh leh mau Kan ngai pawimawh dawn - CM

Vanglaini palaiin nimina a kawmnaah Chief Minister chuan, MNF an sorkar aṭangin kum hnih a liam tâk thu sawiin, "A taka sorkar kan kal, hma kan han chhawp chu thla 8 ṭha âwrh chauh a ni. Kan ti ṭan dawn chauh a, Model Code of Conduct-in June min thlentir a, fûr hna thawh theih loin a nang zui a ni," a ti a; hna an thawk theih dawn chauh a, Covid-19 a lan zui thu a sawi.

CM Zoramthanga chuan, Covid-19 avangin hna a thawh theih loh mai ni loin, finance a ding ṭhup tih sawiin, "Kum kal ta-a kan thawh sawi tlak a ni lo. India leh khawvel pawh a ni vek a, kan inhrethiam turah ka ngai," a ti.

Covid-19 vaccine a awm chuan kumin February thlaah chuan Covid-19 chu a zualpui sutkian theih a beisei thu sawiin CM Zorama chuan, "Central-in chhiah an hmuh tlem avangin chhiah aṭanga kan hmuh ṭhin kan hmu tlem ta em em a, a tam chho turah kan ngai," a ti a; kuminah chuan sorkar laipui aṭanga sum hmuh a pun leh hmalak theih an inbeisei thu a sawi.

Zoramthanga chuan, programme pang­ngai nei an nih thu sawiin, "Pakhatnaah chuan chawa intodelh a ni. Leileta kan siam theih zawng zawng hi siam ila, Zoram châwm zo zân buh kan thar thei ang a, thlasikah wheat kan mamawh ang kan thar thei hialin ka ring. Sa-ah pawh ram dang aṭanga lak luh ngai miah lo tura intodelh turin theihtawp chhuah kan tum," a ti.

Chief Minister chuan, chawa intodelh tih chuan buh, thlai leh saa intodelh a huam vek thu sawiin, "Kan programme pui ber a ni a, he lamah hian kan kal char char ang. A ṭul angin central-ah pawisa kan dil dawn a ni," a ti a, chawa intodelh turin project pui kalpui an tum tih a sawi.

Economy lamah bamboo project an ngaih pawimawh thu sawiin CM Zorama chuan, "Bamboo project kan kalpui theih lohna chhan chu, kan ṭan dawn chauh a, Covid-19 avangin khu lama a chî siamtute pawh an châwl ṭhup a, supply a ding a ni. A ṭiak 80,000 chu kan phuntir a, a thi tâwk pawh a awm ang. A chhan chu kalkawngah a thang rei a, a lo thi hman a ni," a ti.

CM Zoramthanga chuan, nikum lamah mau chu a enchhinna ang leka an tih thu sawiin, "Kuminah chuan theihpatawpa ṭan kan  tum a, chu chu mipui economy tihsanna tur a ni. A ṭiak inthawnna a rei lutuk loh nan a chi siamtu Dr Bhartia chuan Mizoramah a siamna tur hmun min loh ngaihtuah ula a tia, a phûr khawp mai," a ti a; Mizoram chu mauah India rama sorkar level-a ti awmchhun a nih thu a sawi. 

A kaihhruai sorkarin kawng an ngaih pawimawh thu sawiin Zoramthanga chuan, "Kawng a ṭhat loh chuan eng mah a tih theih loh. Sorkar laipuiin state capital-te 4 lane-in chhun vek turin a ti a. Kohima pawh Dimapur aṭangin rem leh rem loin an ti a ni. Mizoramah chuan kan huphurh pui ber chu Tlawng kam a ni a, 2 lane pawh tih hleih theih a ni lo," a ti.

Chief Minister chuan, Tlawng kam vela 4 lane kawngpui siam tur chuan a chanve deuh thaw tláng tan a ngaih tur thu sawiin, "A min leh tur nen kan huphurh a ni. Mualkhang phei lam aṭangin a tih theih em tih survey mek a ni. Aizawl khawpui hnuaiah Bawngkawn hnuaia verh tlang mai a, Chite hnára chhuka World Bank kawng nen inzawm a ṭhat kan ring," a ti a; engineer-te nen an enchhin fo tawh thu a sawi.

Aizawl khawpuia fly-over siam tum chungchang sawiin Zoramthanga chuan, "Bawngkawn leh Vaivakawnah fly-over siam tum a ni a, a namailo khawp mai. Kawng chi tinrêngin kan bei mek a ni," a ti.

Chief Minister chuan, tui supply-ah nasa taka hmalak an tum thu sawiin, "Tlawng a thlen hnua pump chhoh leh hi a man a to. Chuvangin tlanga luang lâk khawm dan tur kan ngaihtuah. Israel technology angin tihzàwl a, thîr lèn khawng ṭha kual a, a tikhawng tur dah tum a ni. Chumiah chuan geomembrant dah mai tur," a ti a; Jal Shakti Ministry hnuaiah tui khâwl khawmna atan sum a tam thu a sawi.

Sports chungchang sawiin CM Zoramthanga chuan, "Pu Roberta'n a bei ṭha bawk a, sum sanction crore sang tél kan nei tawh. Hei hi kan kal chhohpui dawn a ni," a ti.