KHAWTHLIR

Evangelical Church of Maraland (ECM) chuan January 3, Pathianni khan rampum huapin ram tana ṭawngṭai rual an huaihawt a, tualchhung kohhran hrang hrangte an ṭawngṭai. ECM rorelna sang ber, Assembly-in a rèl tawh angin ECM kohhrante hian kum tin Pathianni hmasa berah ram tana ṭawngṭai rual hun an hmang ṭhin a; kumina an ṭawngṭai rualnaah hian thupui 17 an siam a ni.

Indo-Myanmar ramri kaltlanga dan loa kuhva lak luh, thlai hrik pâi eng emaw zat chu Zokhawthara Plant Quarantine Station-ah January 1 & 2 khan hâl ral a ni. India leh Myanmar nena insumdawn tawnna tura luhka atana ruat Zokhawthara point of entry ni lo, kawng dang aṭangin October 2020 aṭangin dan loa kuhva lak luh a ni ṭhin tih hriat a ni a; December 11, 2020 khan kuhva hrik zinga mi, thlai dang tichhe thei hmuh chhuah a ni a, chuvang chuan kuhvate chu hâl ral a ni.

Sorkar thuchhuah tarlan danin, kum 2020 chhung khan Lunglei district-ah lirthei 2,122 ziah luh (register) a ni a; passenger tax, goods tax, parking fee, bus ticket hralhna leh a dangte aṭangin revenue Rs. 2,55,92,876 hmuh a ni. Driving licence 1,000 leh learner license 3,131 pek chhuah a ni a, passenger motor permit 146 pek chhuah a ni bawk.

Hriangtlang khua aṭanga Serchhip District Hospital-a nau nei tura kal nu pakhat chuan kawng lakah nau a vei avangin Serchhipa medical officer Dr Lalhlupuii leh a thawhpuite'n kawng lakah nau an chhar. Thu dawn danin, January 2, 2020 zan khan nau nei tur hian kawng lakah nau a vei avangin Serchhip District Hospital-a thawkte an ko a, Dr Lalhlupuii leh a thawhpuite'n an awmna hmun pan nghalin, ṭha takin nau an hrintir a ni. 

Peoples' Conference (PC) Party chuan thuchhuah siamin, police leh khawtlang hruaitute thawhrimna avangin kum dang aiin kum hlui thlahna leh kum thar lawmna muanawm tak a awm niin an tarlang