COVID-19: Mizoram dinhmun Hri kái zinga 98.20% chhuak tawh

January 3, Pathianni khan Mizorama swab sample 185 endik zingah Covid-19 vei hmuh chhuah a ni lo. Nimin khan hripui laka fihlîm tawh mi 20 chhuahtir an ni thung. Mizorama Covid-19 positive hmuh tawh zat chu mi 4,223 an ni a, mi 4,127 chu dam takin an chhuak tawh a, hri kái zat aṭangin 98.20% an tling.

Pathianni khan district pathumah TrueNAT-PCR hmangin swab sample 135 endik a ni a, Rapid Antigen Test (RAT) hmangin district paliah sample 50 endik a ni bawk a; Covid-19 vei hmuh chhuah a ni lo. ZMC laboratory erawh chu Pathianni a nih avangin khâr a ni.

Nimin khan Covid-19 laka fihlîm tawh mi 20 chhuahtir an ni a; Aizawl district-ah mi 12, Lunglei district-ah mi pali leh Champhai leh Hnahthial district-ah mi pahnih ve ve an chhuak. 

Mizorama Covid-19 vei mi 4,223 hmuh chhuah tawhte chu mipa 3,103 leh hmeichhia 1,120 an ni a; nimin tlai dar 5 thleng khan damin mi 4,147 (98.20%) chhuahtir an ni tawh a, mi pariat (0.19%) thi tawhin, enkawl mek mi 68 (1.61%) an awm.

District panga - Siaha, Champhai, Mamit, Saitual leh Khaw­­zawl district-ahte Covid-19 positive an awm tawh rih lo. 

Mizoramah swab sample 1,81,350 endik a ni tawh a, chu'ng aṭang chuan Covid-19 positive mi 4,223 hmuh chhuah niin, endik zat aṭangin 2.33% a ni.

Mizoram páwn - Kolkata, Guwahati leh Silchar-ahte Mizoram aṭangin sample 58 endik a ni a, April 7, 2020 aṭangin ZMC-ah sample endik ṭan niin, kumin January 3 thlengin sample 91,316 a ni tawh. TrueNAT-PCR hmangin sample 16,136 leh RAT hmangin sample 73,840 endik a ni tawh bawk.

Mizorama hripui vei hmuh tawh mi 4,223 zinga 2,583 chu ZMC laboratory-a hmuh chhuah a ni a, 60.93% a tling. TrueNAT-PCR hmangin positive mi 646 (15.30%) leh RAT hmangin positive mi 1,003 (23.75%) hmuh chhuah a ni.

Covid-19 vei hmuh chhuah tawh mi 4,223 zinga mi 2,001 chu Mizoram chhunga kái chhâwng an ni a; mi 2,222 chu Mizoram páwn aṭanga an rawn luh hnua hmuh chhuah an ni thung.

Hripui vei hmuh tawh zinga mi 3,036 chu civil mi an ni a, hmuh chhuah tawh zat aṭangin 71.89% a tling. BSF mi leh sa 567, Assam Rifles mi leh sa 248, NDRF mi 32, CRPF mi leh sa 31, sipai (army) 44, BRO/BRTF mi 80 leh truck enkawltu (driver leh handyman) 185 an tel bawk.