ZPM party kan thláwp zel dawn - ZLP

ZPM Legislature Party (ZLP) chuan thuchhuah siamin, MLA aṭanga Lalduhoma bàn a nih hnua MNF Legal Board-in ZLP member-te an la vau zui chu ngawih bopui harsa an tih thu an tarlang a; danin a phal angin, ZPM party chu an thláwp zel dawn tih an puang.

ZLP chuan, "MNF Legal Board-in kan Leader Pu Lalduhoma chu MLA aṭanga ban a nih hnuah pawh duh tâwk mai loa keini a naute min vau zui leh zel hi ngawih bopui harsa kan ti. Registration tihfel hman loh vang maia independent-a ding hi India ramah hian party tam tak an awm tawh a, tu mahin hêk tinah an la tin chhin ngai lo," an ti.

Mizoram inthlanah independent-a ding, MLA atana thlan tlin mi 42 an awm tawh tih ZLP chuan an tarlang a; chungte chu - kum 1987-ah MNF MLA 24, kum 1989-ah MNF-D MLA pahnih, kum 1993-ah MJD MLA pasarih, kum 2005-ah MCP MLA pahnih leh kum 2018-ah ZPM MLA pasarihte an ni.

ZLP member-te chu independent pangngai an ni lo tih Mizoram sorkarin a hai lo tih sawiin ZLP chuan, "Mizoram official calender-ah pawh kan hming zâwnah 'ZPM MLA' tiin an ziak a, Speaker ngei pawhin ZPM Legislature Party kan din chu min pawmpui thlap bawk," an ti a; ZLP leader Lalduhoma chu sorkar lai MNF-in hnawksak an tih avangin, session-a a ṭhut ve loh dan tur an dap hnuhnawh mai tih an tarlang.

ZLP tarlan danin, MNF party chu anmahni ticket ngeia thlan tlin MLA-te'n an lo phatsan tawh ṭhin a, an lakah hêkna an thehlut ngai lo. Party dang MLA pali uiréte pawh lo kuangkuah tawh ṭhintu an nih avangin MNF chu mi dang chunga kutthlak turin 'moral right' an nei loah an ngai a ni.

Independent MLA pangngaite pawhin political party an thláwp thiang tih sawiin ZLP chuan, "Sorkarah telin minister-te pawh an ni thiang a, an ni fo bawk. Chuvangin, keini ZPM Legislature Party member-te pawh hian danin min phalsak angin ZPM party hi kan support zel dawn tih kan puang nawn leh a, chumi avanga kan chunga action an la a nih chuan an thu thu a ni e," an ti.