Mizoram Liqour Prohibition Rules Mizoram sorkarin a ennawn dawn
Mizoram (Liqour Prohibition) Rules (MLP Rules) chu 'by notification' hmanga tihchhuaha hman tum a ni a; mahse, December 29, Thawhlehnia Council of Ministers ṭhukhawm chuan ennawn leh phawt an rêl.
Vanglaini thu dawn danin, Excise & Narcotics department chuan Covid-19 avangin Assembly session neih hleih theih a ni lo a, chuvang chuan MLP Rules chu 'by notification' hmanga hman rih mai an duh a ni. Mahse, Council of Minister chuan Rules chu ennawn leh phawt a, chumi hnuah kalpui dan tur sawiho leh an rél a ni.
MLP Rules hi December 19, 2019 khan notification hmanga tihchhuah a nih hnuah sût (cancel) leh a ni. Rules tihchhuah tawh ang chuan, phalna nei tan beer leh wine siam leh zawrh theih a ni a, hun bikah chuan tualchhung zu (local liquor) siama zawrh theih a ni.
Sorkarin zu dah khawmna kudam a siam dawn a, chuta ṭang chuan phalna nei tan zu lei theih a ni ang.
December 19, 2019-a tihchhuah tawh MLP Rules chu sût a nih hnuah ennawn a ni a, zu zawrh phalna ang chi chu ṭhiah vek niin, Hnahlan leh Champhai grape winery-te tan remchang siam tum a ni. Rules duan thar chu END chuan notification hmanga tihchhuah mai an tum a; mahse, Council of Minister chuan ennawn leh turin thutlukna a siam ta a ni.