Tiranga Mela & Concert buatsaih a ni

India Independence Day vawi 79-na thleng tur pualin nimin khan Vanapa Hall-ah Tiranga Mahotsav – Tiranga Mela leh Tiranga Concert buatsaih a ni a, Art & Culture minister C Lalsawivunga'n a hawng.

India hnam puanzar puala Vanapa Hall-a hun hmanah hian Mizo kutchhuak thil hrang hrang pho chhuah a ni a; zaithiam leh band hrang hrang te, sikul naupangte leh Art & Culture department hnuaia Institute of Music & Fine Arts zirlaite'n zai leh hnam lâm an entir. Tiranga Mela hi August 14, 2025 thleng neih a ni ang.

C Lalsawivunga chuan, India hnam puanzar hnuaiah hnam hrang hrang leh ṭawng hrang hrangte huang khatah an luang za tih sawiin, "Hnam puanzar rawng chi thumin a entir inpumkhatna hi kan vawng nung ṭheuh tur a ni," a ti a; ram leh hnam tana intuk luhna thinglung nei deuh deuh turin kal khawmte a chah.

Ministry of Culture-in Har Ghar Tiranga programme a buatsaih hnuaia peng pakhat, Tiranga Mahotsav hi India ramin zalenna a neih champha kum 75-na pualin kum 2022 khan hman ṭan a ni a; India rama hnam hrang hrangte chu hnam puanzar hnuaiah zài khata luang za an ni tih a lantir nan hnam puanzar chawisang tur leh in tina zar tura hmalakna a ni.

Tiranga Mahotsav hnuaiah hian India hnam puanzar kenga kawngzawh (Tiranga Yatra) te, hnam ro hlu leh thar chhuahte pho chhuahna (Tiranga Mela) te, hnam zai leh lâmtea intihhlimna (Tiranga Concert) te buatsaih a ni.