Zangnadawmna pek an nih loh chuan rêl kawnga an ram chin hung an tum

Bairabi leh Sairang inkar rêl kawng siamna atana ram laka zangnadawmna la dawng lote chuan, August 2025 chhunga zangnadawmna pek an nih loh chuan an ram chin an hung dawn thu an puang.

Zangnadawmna la dawng lo nia insawi Sairang khaw mite chuan nimin khan Aizawl Press Club-ah thuthar thehdarhtute an kâwm a; rél kawng siam tur avanga an ram lak a ni chungin tun thlengin zangnadawmna an la dawn loh thu sawiin, "Zangnadawmna kan dawn loh chhan tak hi kan hrethiam bik lo," an ti.

Zangnadawmna la dawng lote sawi danin, an ram chu enfiah (survey) neiin, a hmunah pawh enfiah a ni a, rêl kawng siamna atan tihchhiat a ni tawh. Zangnadawmna chungchang chu Aizawl DC hnenah an thlen a, DC lamin Railways lama thlen turin an ti a; Railways lama an thlenin DC lama thlen turin an lo ti ve leh thung ṭhin a ni.

August 2025 chhunga zangnadawmna pek an nih loh chuan an dikna humhim turin a tàwp thlenga hmalak an tum a, an ram chin hung an tum a ni. Zangnadawmna pek an la nih loh chungchang hi Prime Minister leh Railways Minister hnenah pawh an thlen tawh.

Zangnadawmna la dawng lote hi an vaiin mi 14 an ni a, an zinga 10 chuan a ṭhen azar dawngin an dawng kim lo a, pali chuan an la dawng lo hrim hrim thung. Mi 14-te zangnadawmna dawn tura thuneitute'n an chhût chhuah chu a vaiin cheng vbc. 14.56 a ni.