Mamit district-a kawng siamna tur MoRTH-in cheng vbc. 48.63 a rawn pe

Sorkar laipuia Ministry of Road Transport & Highways (MoRTH) chuan Mizorama kawng panga siamna atan August 11, Thawhṭanni khan cheng vbc. 48.63 a rawn pe.

Kawng siamna tur sum pek thu hi MoRTH hotute chuan August 11, 2025 khan ziakin Mizoram PWD Secretary an rawn hriattir a; Mizoram sorkarin estimate a thehluh chu cheng vbc. 51.10 ni mah se, vbc. 48.63 pek a nih thu leh, kawng siam chu hun ruatah zawh ngei tur a nih thu tarlan a ni.

Cheng vbc. 48.63 hmang hian Mamit district-a NH-44A by-pass road kawng hlui siam tur a ni a; chu'ngte chu - Rawpuichhip panna kawng (km. 27-35), Dâpchhuah - Dâmpui (km. 50-70), Mamit - Bâwngvâ (km. 75 - 91), Dárlâk - Tuidam (km. 105 - 112.70) leh, Tumpanglui/New Eden kawng (km. 120.24 - 121.84) te a ni.

PWD minister Vanlalhlana chuan, tuna MoRTH-in sum a rawn pek chungchangah hian July 23, 2025 khan MoRTH minister Nitin Gadkari hnenah sum pe thuai tura ngenna DO letter a ziah thu a sawi a, "Khawthlang lam kawng pawimawh em em leh fûra kan buai fona kan siamṭha thei tur hi lawmawm ka ti tak zet a, a chhawrtu tur Mamit district mipuite ka lawmpui hle a ni," a ti.