KHAWTHLIR

HBC-in thisen pe

Hrangbana College NSS chuan nimin khan blood donation camp an huaihawt a, Civil Hospital, Aizawl tan thisen unit 87 an pe. Thisen petute hi mipa 65 leh hmeichhia 22 an ni.

Awareness campaign

Assam Rifles chuan nimin khan Mizoram chhim tawp khua Zochachhuahah tualchhung mite nena inṭhian ṭhatna atan volleyball inkhelh an huaihawt a, tualchhung mi ṭhahnem tak an tel. AR hian August 11, Thawhṭanni khan Siahaa Maraland Academy School-ah naupang chunga hleilenna laka inven dan zirhona an buatsaih bawk.

Red Ribbon Quiz

Mamit District Red Ribbon School Quiz Competition on HIV/AIDS 2025 chu nimin khan Mamit College seminar hall-ah huaihawt a ni a, district education officer K Lalnunfela'n a hmanpui. Quiz intihsiakah hian Lengte Secondary School-a pawl 9 zirlai Elizabeth Laldinsangi leh Lalhmangaihzuali te pakhatna an ni.

War Memorial tifai

BJP, Mizoram Pradesh chuan Har Ghar Tiranga pualin nimin khan Assam Rifles mandir bul, Zodin Square-a War Memorial leh a chhehvel an tifai. Kumina Independence Day pualin Mizorama district hrang hrangah vawiin hian hnam puanzar nen two-wheeler rally buatsaih an tum thu an tarlang.

Power pe dawn lo

Vawiin hian 33KV Sub-Station, Tlangnuamah 2x10MVA, 33/11KV transformer thar dahna tur siam rem a ni dawn a, hei vang hian chawhma dar 10 aṭanga chawhnu dar 2 thleng kawlphetha pek chhuah a ni dawn lo. Khatla chin chhim lam leh tlak lama veng hrang hrang te, Lungleng leh Reiek thlengin kawlphetha pek a ni dawn lo a ni.

BJP-in mipui ngen

BJP, Mizoram chuan thuchhuah siamin, BJP member ṭhenkhat, BJP an nihna hmanga sorkar laipuia project leh thil dang tihpui thei anga insawia mi bum ṭhin an awm tih an tarlang a, "Chutiang mite chu kan hriatpui lo a, Mizoram mipuite fimkhur turin kan ngen e," an ti.

Aizawlah sangha no sem

Fisheries department chuan Pradhan Mantri Matsya Sampada Yojana (PMMSY) scheme aṭangin nimin khan Aizawl leh a chhehvela sangha khawitute hnenah sangha no an sem. Fisheries department hian sangha note chu PMMSY hnuaiah a man 75% subsidy-in an sem a, Aizawl district atan sangha no 6,03,600 sem tura ruahman a ni. Kumin chhungin Sialsuk Circle, Darlawn Circle leh Thingsulthliah Circle-ahte sangha no 5,84,600 an sem tawh a ni.