CM leh Minister programme vangin Mamit DC-ah complaint thehluh a ni

Chief minister Zoramthanga leh Sports minister Robert Romawia Royte ten December 10, 2020-a Mamit, Kawrthah leh Tuidama thil siam/sak thar tur lungphùm an phùmna leh an hawnnaah Covid-19 chungchanga sorkar dan siam bawhchhiat a ni ngeia hriat a nih avangin Lalhriatrenga Chhangte, Kulikawn chuan December 29, 2020 khan Mamit DC-ah complaint a thehlut.

Lalhriatrenga Chhangte-in a tarlan danin, December 10, 2020-a Mizoram sorkar press release (No.6845/2020-2021) aṭang leh media-a finfiahna (documentary evidence) dangte aṭangin, CM Zoramthanga leh minister Robert Romawia Royte ten December 10, 2020 khan Mamit, Kawrthah leh Tuidam khuaahte official programme an nei tih hriat a ni.

Mamit district chhunga khaw pathuma sorkar official programme tinah chuan mi 35 aia tam an pung khawm tih tarlangin Lalhriatrenga chuan, "Ram hruaitu Chief Minister, Sports Minister, sorkar mi pawimawh leh khawtlang hruaitute'n Mizoram sorkarin dan a siam, The Mizoram (Containment & Prevention of the Spread of Covid-19) Act, 2020 Section-4 leh inkaihhruaina dan Standard Operating Procedures (SOP)-te an bawhchhia tih a lang a, a pawi hle a ni," a ti.

Lalhriatrenga Chhangte-in a tarlan danin, Chief Minister, Sports Minister leh sorkar official dangte'n Mizoram (Containment & Prevention of the Spread of Covid-19) Act, 2020 Section-4 hnuaia sub section (1) - vantlang hmuna hmai tuam, (2) - vantlang hmuna social distancing protocol/guidelines kenkawh, (4) - phalna la hmasa loa punkhawm leh, (9) - state sorkar leh central sorkar dan/kaihhruainate an bawhchhia a ni.

Mamit district-ah Chief Minister leh Sports Minister ten dan an bawhchhiatnaah Mamit DC chu District Task Force on COVID-19 Chairman a nih angin, dan anga hma latu tur a nih thu ziakin Lalhriatrenga chuan, "Dan anga action lâk a nih loh chuan The Mizoram (Containment & Prevention of the Spread of Covid-19) Act, 2020 ngaih pawimawh lohna pawi tak a ni ang," a ti a; mipuiin dan bawhchhiat pawi an tih loh phahna tura an entawn theih a nih tur thu a tarlang bawk.