NDMA-in Mizoram sorkar hotute an kâwm

Mizorama khuarel chhiatna thleng zir tura rawn zin National Disaster Management Authority (NDMA) hotute chu nimin khan Disaster Management & Rehabilitation (DMR) minister Prof. Lalnilawma leh DMR officer-te nen minister pisaah an inkâwm a; Mizoram district tina khuarel chhiatna - leimin, tuilian, lirnghing leh a dangte thlen theihna (hazard risk vulnerability analysis) an thlirho.

Inkawmhonaah hian Mizorama khuarel chhiatna lian tham thleng tawh hrang hrang - Hlimen leimin (1992), Siaha leh Lawngtlaia ruahpui vânâwn vanga chhiatna (1995), Laipuitlang leimin (2013), kum 2017-a tuilian leh Champhaia lirnghing (2020) chungchangte thlirho a ni a; khuarel chhiatna vanga harsatna thleng thei tihziaawm dan (disaster mitigation) leh chhawmdawlna (rehabilitation) atana chak zawka thawhho dan turte sawiho a ni bawk.

NDMA hotute hi nimin vêk khan Royale Lalawi Hotel conference hall-ah Aizawl leh Lunglei District Disaster Management Authority (DDMA) hotute nen an inkâwm.

Inkawmnaah hian Aizawl DDMA chairman Lalhriatpuia, bawrhsap leh Lunglei DDMA aiawhin DMR district organizer Chuaupari Pachuau ten an district ve vea khuarel chhiatna thlengte an hmachhawn dan tlangpui a sawifiah.

NDMA aiawhin senior consultant Rajan Kumar Borah-a'n NDMA nihphung leh mawhphurhna te, NDMA hnuaia scheme te, DM Act 2005, Standard Operating Procedures (SOPs) leh guideline-te a sawifiah bawk.

NDMA joint advisor Dr SK Jena chuan, DDMA-te chu chhiatna a thlena hmachhawn hmasatu an nih avangin chhiatna thleng an buaipui dan te, Disaster Management Plan te, DDMA chak lohna laite hriat an duh vanga Mizorama rawn kal an nih thu a sawi a, "Mizorama chhiatna lo thleng tawhte in hmachhawn dan te, a pumpelh tura in inpuahchahna te, chhiatnain harsatna a thlente tiziaawm tura hma in lak dante rawn hriat a, in tih dan ṭha laite aṭangin India ram hmun dangte tan zir tur awm thei chi leh hmasawn ngaihna laite hre tura lo kal kan ni," a ti.

NDMA hotute hian nimin vek khan Aizawl District Emergency Operating Centre an tlawh a; vawiin hian Champhai leh Khawzawl district an tlawh leh dawn a ni.